रेल्वे डब्यात झोपण्याच्या वेळेत १ तासाची घट

मटा ऑनलाइन वृत्त। नवी दिल्ली

रेल्वेतून लांबचा प्रवास करत असताना झोपण्यावरून होत असलेले वादविवाद, भांडणे आता थांबतील अशी आशा करायला काही हरकत नाही. याचे कारण म्हणजे, रेल्वेने सीटवर झोपण्याच्या अधिकृत वेळेत एका तासाची घट केली आहे. याबाबत रेल्वेने काढलेल्या परिपत्रकानुसार आरक्षित डब्यांमधील प्रवासी आता रात्री १० ते सकाळी ६ वाजेपर्यंत याच वेळेत झोप घेऊ शकतात. इतर प्रवाशांना सीटवर बसण्याची संधी प्राप्त व्हावी हे यामागचे कारण असल्याचे रेल्वेने स्पष्ट केले आहे.

यापूर्वी डब्यात झोपण्याची वेळ रात्री ९ ते सकाळी ६ अशी ठेवण्यात आली होती.

३१ ऑगस्टला काढलेल्या या परिपत्रकानुसार, आजारी, दिव्यांग आणि गर्भवती महिला प्रवाशांना या नियमातून सूट देण्यात आली आहे. इतर प्रवाशांनी अशा प्रवाशांना सहकार्य करावे असे आवाहन रेल्वेकडून करण्यात आले आहे. यानुसार असे प्रवासी रात्री १० वाजण्यापूर्वीही झोप घेऊ शकणार आहेत.

आरक्षित डब्यांमधील सीटवर झोपल्याने इतर प्रवाशांची गैरसोय होत असल्याबाबतची माहिती आमच्याकडे आल्याचे रेल्वे मंत्रालयाचे प्रवक्ते अनिल सक्सेना यांनी या निर्णयाबाबत माहिती देताना सांगितले. हा नियम शयन सुविधा असलेल्या सर्व आरक्षित डब्यांना लागू होणार असल्याचेही ते म्हणाले. याबाबत अधिक माहिती देताना एक रेल्वे अधिकारी म्हणाला की, काही प्रवासी ट्रेनमध्ये चढल्याबरोबर आपल्या सीटवर झोपतात, मग तो दिवस असो की रात्र. यामुळे लोअर किंवा मिडलमधील प्रवाशांची गैरसोय होते. याचमुळे झोपण्याच्या वेळेत एक तासाची कपात यासाठी करण्यात आली आहे.

या नियमामुळे झोपण्यावरून होणारे वाद सोडवण्यामध्ये टीटींना देखील आता सोपे जाईल असेही रेल्वे मंत्रालयातील एक अधिकारी म्हणाला.