दाऊद इब्राहिमची ब्रिटनमधील संपत्ती जप्त

मटा ऑनलाइन वृत्त । नवी दिल्ली

१९९३च्या मुंबई बॉम्बस्फोटांचा मास्टरमाइंड, अंडरवर्ल्डचा म्होरक्या दाऊद इब्राहिमची ब्रिटनमधील अब्जावधींची संपत्ती जप्त करण्यात आल्याचं कळतं. तपास यंत्रणांनी दाऊदच्या नाड्या आवळण्यास सुरुवात केल्याचं या कारवाईतून स्पष्ट झालं आहे. तसंच, मोदी सरकारच्या मुत्सद्देगिरीचं हे यश मानलं जातंय.

दाऊद हा भारताला हवा असलेला 'मोस्ट वाँटेड' दहशतवादी आहे. त्याच्याभोवती चौकशीचा फास आवळण्यासाठी केंद्र सरकार प्रयत्न आहे. वेगवेगळ्या देशांकडे त्याच्या कुकर्माचे पुरावे भारताने दिले आहेत. २०१५ मध्ये ब्रिटनलाही भारताने ही फाइल दिली होती. त्या आधारे तपास करून ब्रिटिश सरकारने दाऊदच्या संपत्तीवर टाच आणली आहे. वॉरविकशायरमधील एक हॉटेल आणि अनेक घरं दाऊद इब्राहिमच्या नावावर होती. त्याला ब्रिटिश तपास यंत्रणांनी सील ठोकलं आहे.

दाऊद इब्राहिमला पाकिस्ताननं आश्रय दिल्याचं बोललं जातंय. त्याबाबतचे ठोस पुरावे नसले, तरी भारतीय सुरक्षा यंत्रणांचं प्रत्येक हालचालीकडे बारीक लक्ष आहे. गेल्या महिन्यात ब्रिटनच्या वित्तखात्याने एक यादी जाहीर केली होती. त्यात, दाऊदचे पाकिस्तानातील तीन पत्ते देण्यात आले आहेत.

दरम्यान, फोर्ब्समधील माहितीनुसार दाऊदची एकूण संपत्ती ६.७ अब्ज डॉलर्स इतकी असून जगातील श्रीमंत गँगस्टर्सच्या यादीत तो दुसरा आहे. कोलंबियातील ड्रग माफिया पाब्लो एस्कोबार या यादीत पहिल्या स्थानावर आहे.