इंदिरा गांधींनी लोकशाहीची ‘घराणेशाही’ केली!: जेटली

मटा ऑनलाइन वृत्त । नवी दिल्ली

केंद्रीय अर्थमंत्री अरुण जेटली यांनी २६ जून १९७५ रोजी इंदिरा गांधींच्या काळात लागू करण्यात आलेल्या आणीबाणीचा संदर्भ देत आपल्या फेसबुक पोस्टमधून काँग्रेसवर जोरदार हल्लाबोल केला आहे. ‘इंदिरा गांधी यांनी भारतीय लोकशाही घराणेशाहीत बदलून टाकली,’ असा आरोप त्यांनी केला आहे.

‘भारताच्या स्वातंत्र्यानंतरचा काँग्रेसचा इतिहास चाळून पाहिल्यास त्यावर अनेक डाग दिसतात. तब्बल दोन दशकं रखडवलेल्या आर्थिक सुधारणा, लोकशाहीचं घराणेशाहीत केलेलं रूपांतर, १९७५मध्ये लागू केलेली आणीबाणी, ऑपरेशन ब्लू-स्टार आणि भ्रष्टाचार हे ते डाग आहेत,’ असं जेटली यांनी म्हटलं आहे.

काँग्रेसच्या सध्याच्या नेतृत्वाकडे याबद्दल स्वत:चं काही मत आहे का, या विषयांवर काँग्रेस पक्षात कधी अंतर्गत चर्चा होईल का, हे प्रश्नच आहेत,’ असा चिमटाही जेटली यांनी काढला आहे. पंजाबमधील आगामी विधानसभा निवडणुकांच्या पार्श्वभूमीवर जेटली यांनी आपल्या पोस्टमध्ये इंदिरा गांधी व ‘ऑपरेशन ब्लू स्टार’चा जाणीवपूर्वक उल्लेख केल्याची चर्चा आहे.