वृत्तसंस्था, पॅरिस
'फ्रान्सचे संरक्षण मंत्री फ्लोरेन्स पार्ली यांच्याशी झालेली चर्चा फलदायी ठरली असून, या चर्चेत उभय देशांच्या संरक्षण सहकार्याचा व्यापक आढावा घेण्यात आला,' अशी माहिती संरक्षण मंत्री राजनाथसिंह यांनी बुधवारी दिली. सिंह सध्या फ्रान्सच्या दौऱ्यावर आहेत.
दहशतवादविरोधी लढ्यात भारत व फ्रान्सचे संबंध अधिक मजबूत करण्याविषयी चर्चा करण्यात आली, असी माहिती संरक्षण मंत्रालयाने एका निवेदनाद्वारे दिली. या बैठकीनंतर राजनाथसिंह यांनी 'ट्वीट' करून चर्चा फलदायी झाल्याची माहिती दिली. 'उभय नेत्यांनी द्विपक्षीय संरक्षण संबंधांचा सर्वंकश आढावा घेतला. हे संबंध उभय देशांच्या धोरणात्मक सहकार्याचा महत्त्वाचा आधारस्तंभ आहेत,' असे संरक्षण मंत्रालयाच्या निवेदनात नमूद केले आहे. 'उभय देशांच्या हिताच्या प्रादेशिक आणि आंतरराष्ट्रीय मुद्द्यांवरही उभय नेत्यांनी चर्चा केली. उभय देशांतील संरक्षण संबंध कृतीच्या स्तरावर येण्याच्या दृष्टीने चर्चा केल्यानंतर सध्याचा संयुक्त सराव अधिक व्यापक व्हा, या मुद्द्यावर एकमत झाले,' असेही निवेदनात म्हटले आहे. उभय देशांतील धोरणात्मक आणि सुरक्षाविषयक संबंध कायम ठेवून ते वाढविण्यावर भर देण्यात येणार असून, भारत-फ्रान्स सहकार्याच्या संयुक्त धोरणात्मक आराखड्यानुसार अंमबलबाजवणी करण्याविषयीही चर्चा झाली. दरम्यान, फ्रान्स लष्कराच्या पॅरिस येथील मुख्यालयात राजनाथसिंह यांना लष्करी सलामी देण्यात आली.