'मूडीज'च्या रेटिंगमुळं जेटली मूडमध्ये

मटा ऑनलाइन वृत्त । नवी दिल्ली

सरकारच्या आर्थिक सुधारणांचं कौतुक करत जागतिक पत निर्धारण संस्था 'मूडीज'नं भारताचं क्रेडिट रेटिंग वाढवल्यामुळं मोदी सरकार मूडमध्ये आलं आहे. गेल्या वर्षभरापासून विरोधकांच्या रडारवर असलेले केंद्रीय अर्थमंत्री अरुण जेटली यांनी ही संधी साधत विरोधकांवर हल्लाबोल केला आहे. सरकारच्या आर्थिक निर्णयांबद्दल ज्यांच्या डोक्यात शंकाकुशंका आहेत, त्यांनी आता गंभीरपणे आत्मपरीक्षण करावं,' असा टोला जेटली यांनी हाणला आहे.

जीएसटी, नोटाबंदी, डायरेक्ट बेनिफिट ट्रान्सफर, आधार लिंकिंगसारख्या निर्णयांचं कौतुक करत 'मूडीज'नं भारताच्या क्रेडिट रेटिंगमध्ये सुधारणा केली आहे. या निर्णयामुळं खूष झालेल्या जेटली यांनी पत्रकार परिषद घेऊन टीकाकारांवर निशाणा साधला. 'देशाची अर्थव्यवस्था दिवसागणिक अधिक मजबूत होत असल्याचे अनेक पुरावे मिळत आहेत. मात्र, 'मूडीज'सारख्या संस्थेकडून त्यावर शिक्कामोर्तब होणं जास्त महत्त्वाचं आहे. सरकारच्या प्रयत्नांना पोचपावती मिळण्यास उशीर झाला असला तरी आम्ही याचं स्वागत करतो,' असे ते म्हणाले. 'मूडीज'नं मोदी सरकारच्या आर्थिक शिस्तीचं कौतुक केल्याचंही त्यांनी निदर्शनास आणलं.