कसा कराल योगा? आयुष मंत्रालयाची पुस्तिका

मटा ऑनलाइन वृत्त । नवी दिल्ली

बुधवारी २१ जून रोजी आंतरराष्ट्रीय योग दिन साजरा होत आहे. यानिमित्ताने आयुष मंत्रालयाने कॉमन योग शिष्टाचार सांगणारी पुस्तिका काढली आहे. योगाच्या माध्यमातून शांतता आणि सलोखा साधण्यासाठी या पुस्तिकेतून जनजागृती करण्यात आली आहे.

पंतप्रधान नरेंद्र मोदी यांचा संदेश पुस्तिकेत आहे. योगाचा इतिहास, विविध योग संस्थांची माहिती आणि सुदृढ आरोग्यासाठी योगसाधनांची माहिती या पुस्तिकेत देण्यात आली आहे. रेखाचित्रांच्या माध्यमातून योगासनांची माहिती देण्यात आली आहे. मात्र डॉक्टरी सल्ल्याशिवाय आसने करू नयेत असा सल्लाही या पुस्तिकेत दिला आहे.

'योगा पुस्तिकेत देण्यात आलेली माहिती, तंत्र, सल्ले हा वैद्यकीय उपचारांना पर्याय नाही,' असा 'डिस्क्लेमर'देखील पुस्तिकेत आहे. देशातल्या योगतज्ज्ञांच्या आणि योग संस्थांच्या प्रमुखांच्या सल्लामसलतीनुसार ही पुस्तिका तयार करण्यात आली आहे. डिसेंबर २०१४ रोजी संयुक्त राष्ट्रांच्या महासभेने २१ जून हा दिवस आंतरराष्ट्रीय योग दिन म्हणून साजरा करण्यास मान्यता दिली.