पीएनबी: नीरव मोदीविरोधात इंटरपोल नोटीस

नवी दिल्ली:

पंजाब नॅशनल बँकेतील (पीएनबी) महाघोटाळ्यातील आरोपींच्या मुसक्या आवळण्याची तयारी तपास यंत्रणांनी सुरू केली आहे. गैरव्यवहारातील मुख्य सूत्रधार नीरव मोदी, पत्नी अमी मोदी, भाऊ निशाल मोदी आणि गीतांजलीचे प्रमोटर मेहुल चौकसी यांना पकडण्यासाठी इंटरपोललाही सतर्कतेच्या सूचना दिल्या आहेत. या चौघांविरोधात इंटरपोल डिफ्युजन नोटीस जारी करण्यात आली आहे.

नोटीस जारी केल्यानंतर इंटरपोलही या आरोपींच्या अटकेसाठी सक्रिय झाले आहे. हे चौघेही जानेवारीच्या सुरुवातीलाच भारतातून पसार झाले आहेत. याआधी अंमलबजावणी संचलनालयाने मोदी आणि चौकसीला समन्स बजावले होते. सीबीआयनेही या दोघांचे पासपोर्ट रद्द करण्याची मागणी केली आहे.