गुजरातच्या दाहोदमध्ये हिंसाचार; १ ठार

मटा ऑनलाइन वृत्त । दाहोद

गुजरातच्या दाहोदमधील जसवाडा गावात काल सायंकाळपासून हिंसासार उफाळला आहे. संतप्त गावकऱ्यांनी पोलीस ठाण्यावर हल्ला चढविल्यानंतर पोलिसांनी केलेल्या गोळीबारात एकाचा मृत्यू झाला आहे. त्यामुळे जसवाडामध्ये जाळपोळ सुरू असून तणाव निर्माण झाला आहे.

पोलिसांनी गावातील कनेश नावाच्या एका तरुणाला अटक केली होती. त्या तरुणाचा पोलीस कोठडीतच मृत्यू झाला. त्याबाबतचा एफआयआर लिहिण्यास पोलिसांनी नकार दिल्यानं संतप्त झालेल्या गावकऱ्यांनी काल गुरुवारी सायंकाळी पोलीस स्टेशनवर मोर्चा काढून हल्ला चढवला. यावेळी गावकऱ्यांनी पोलीस ठाण्याच्या खिडक्यांच्या काचा फोडण्याचा प्रयत्न केला. पोलिसांची एक गाडी जाळण्यात आली आणि काही गाड्यांना आगी लावण्याचा प्रयत्न करण्यात आला. पोलीस ठाण्याबाहेरही गावकऱ्यांनी जाळपोळ केली. पोलिसांनी गावकऱ्यांना पांगविण्यासाठी हवेत गोळीबार केला. त्यात रामसू मोहनीया नावाच्या एका गावकऱ्याचा मृत्यू झाला. दरम्यान, जसवाडामध्ये सध्या मोठा पोलीस बंदोबस्त ठेवण्यात आला असून गावात तणावाची स्थिती आहे.