'मदर्स डे'च्या दिवशी इरोम शर्मिलानं दिला जुळ्या मुलींना जन्म

बेंगळुरु/इम्फाळ:

मणिपूरमधील मानवी अधिकार कार्यकर्त्या इरोम शर्मिला यांच्यासाठी यंदाचा 'मदर्स डे' आनंद द्विगुणीत करणारा ठरलाय. मणिपूरच्या या 'आयर्न लेडी'नं रविवारी जुळ्या मुलींना जन्म दिला आहे.

इरोम शर्मिला यांनी आपला दीर्घकाळचा ब्रिटिश मित्र डेसमंड काउंटिन्हो याच्याशी २०१७ मध्ये विवाह केला होता. रविवारी या दोघांना कन्या रत्न प्राप्त झाली. शर्मिला आणि त्यांचे पती डेसमंड काउंटिन्हो यांनी आपल्या मुलींची नावं निक्स शाखी आणि ऑटम तारा अशी ठेवली आहेत.

क्लाऊडनाईन ग्रुप ऑफ हॉस्पिटलच्या प्रवक्त्यांनी इरोम यांच्या प्रकृतीबद्दल माहिती देताना सांगितलं की, 'इरोम शर्मिला यांची प्रकृती आता स्थिर आहे. लवकरच त्यांच्या मुलींचे फोटो शेअर केले जातील. सी-सेक्शन म्हणजेच सिझेरियन पद्धतीने त्यांची प्रसूती झाली.'

शर्मिला यांचे डॉक्टर श्रीपाद विनेकर म्हणाले की, 'मदर्स डेच्या दिवशी इरोम आई होणं हा केवळ एक योगायोग आहे. आम्ही कुणीच हे आधी ठरवले नव्हते. आम्ही पुढच्या आठवड्यात तिच्या ऑपरेशनचा निर्णय घेतला होता. मात्र, शनिवारी रात्री इरोम यांच्या पोटात दुखू लागल्यानं आम्ही रविवारी प्रसूतीचा निर्णय घेतला. त्या दिवशी मदर्स डे आहे हे त्यांना माहीतसुद्धा नव्हते. आम्ही त्यांना सांगितल्यावर त्यांच्या हे लक्षात आलं. '