आयएसचे अतिरेकी काश्मीरमध्ये घुसले?

मटा ऑनलाइन वृत्त । श्रीनगर

इस्लामिक स्टेट (आयएस) या दहशतवादी संघटनेचे अतिरेकी आता काश्मीरपर्यंत घुसले आहेत. शुक्रवारी श्रीगरच्या जाकूरा येथे झालेल्या दहशतवादी हल्ल्याची आयएसने जबाबदारी घेतली आहे. आयएसने त्यांच्या 'एहमाक' या न्यूज एजन्सीच्या संकेतस्थळावर एक पोस्ट टाकून या हल्ल्याची जबाबदारी घेतली आहे.

शुक्रवारी जाकूरा येथील पोलीस ठाण्यावर दहशतवादी हल्ला झाला होता. या हल्ल्यात एक पोलीस उपनिरीक्षक शहीद झाला होता. तसेच एक अतिरेकी ठार झाला होता. या अतिरेक्याने आयएसचा लोगो असलेला काळ्या रंगाचा टीशर्ट अंगात घातलेला होता. त्यानंतर दुसऱ्याच दिवशी आयएसने संकेतस्थळावरून हा हल्ला आपणच केल्याचं जाहीर केलं. त्यामुळे काश्मीरमध्ये आयएस सक्रिय होणार असल्याचा गुप्तचर विभागाचा संशय खरा ठरला आहे.

२३ ऑक्टोबर रोजी काश्मीरमध्ये गुप्तचर विभागाने एका टि्वटर हँडलला ट्रॅक केलं होतं. त्यात काश्मीरमध्ये आयएसचा पहिला ग्रुप तयार करण्यात आल्याचं स्पष्ट करण्यात आलं होतं. सध्या हे टि्वटर हँडल बंद करण्यात आलं आहे. या शिवाय महिन्याभरापूर्वी काश्मीरमध्ये आयएसचे झेंडेही दिसून आले होते. अतिरेक्यांना ठार करण्यात आल्यानंतर त्यांच्या अंगावरही आयएसचे झेंडे टाकण्यात आल्याचं आढळून आलं होतं. त्यावर गुप्तचर यंत्रणा लक्ष ठेवून होती.