‘आयएस’च्या दहशतवाद्यांना गुजरातमध्ये अटक

मोठा हल्ला टाळता आल्याचा एटीएसचा दावा

वृत्तसंस्था, नवी दिल्ली

गुजरातमधील धार्मिक स्थळांवर येत्या काही दिवसांत साखळी बॉम्बस्फोट घडवण्याच्या तयारीत असलेल्या ‘आयएस’च्या दोन संशयित दहशतवाद्यांना गुजरातच्या दहशतवादविरोधी पथकाने रविवारी अटक केली.

वसीम आणि नईम रामोदिया अशी अटक करण्यात आलेल्या दोन संशयित दहशतवाद्यांची नावे आहेत. ते एकमेकांचे भाऊ आहेत. राजकोट आणि भावनगर येथून त्यांना अटक करण्यात आली. सोशल मीडियाच्या माध्यमांतून ते ‘आयएस’ या दहशतवादी संघटनेशी संपर्क ठेवून होते. त्यांच्याकडे बॉम्ब तयार करण्याचे साहित्य आढळून आले आहे. चोटिलासारख्या धार्मिक स्थळावर बॉम्बस्फोट करण्याचे त्यांचे नियोजन होते.

दहशतवादविरोधी पथकाचे पोलिस उपाधीक्षक के. के. पटेल म्हणाले, ‘गुप्तहेरांकडून अचूक माहिती मिळाल्यानंतर आम्ही कारवाई केली. ‘आयएस’ या दहशतवादी संघटनेशी संबंधित दोन संशयित दहशतवाद्यांना अटक करण्यात आली आहे. वासीमला राजकोट येथून, तर त्याच्या भावाला भावनगर येथून अटक करण्यात आली. एटीएसने त्यांना पकडण्यासाठी दोन पथके तयार केली होती. बॉम्ब तयार करण्याचे सर्व साहित्य त्यांच्याकडे होते. येत्या दोन दिवसांत धार्मिक स्थळांवर बॉम्बहल्ला करण्याचे त्यांचे नियोजन होते.’ मोठा दहशतवादी हल्ला टाळता आल्याचा दावा पटेल यांनी केला.

पटेल म्हणाले, ‘गन पावडर, स्थानिक पातळीवर तयार करण्यात आलेले बॅटरीसह बॉम्ब, मास्क आदी साहित्य त्यांच्याकडे आढळले आहे. त्यांच्या कम्प्युटरमध्येही आक्षेपार्ह आणि बंदी घातलेला मजकूर सापडला आहे. ट्विटर आणि इतर सोशल नेटवर्किंगच्या साइट्सच्या माध्यमांतून आयएस या दहशतवादी संघटनेशी ते संपर्क ठेवून होते.’ एटीएसचे पोलिस अधीक्षक हिमांशू शुक्ला म्हणाले, ‘चोटिला मंदिर त्यांचे लक्ष्य होते. त्यांची अधिक चौकशी करण्यात येत असून आणखी माहिती देता येणार नाही.’ या महिन्याच्या सुरुवातीला राष्ट्रीय तपास संस्थेने आयएसशी संबंधित केरळमधील एका रहिवाशाला अटक केली होती.