भारताच्या जीपीएस उपग्रहाचं यशस्वी प्रक्षेपण

मटा ऑनलाइन वृत्त । श्रीहरीकोटा

भारतानं आज संपूर्ण स्वदेशी दिशादर्शक यंत्रणा उभारण्याच्या दृष्टीनं एक महत्त्वाचं यशस्वी पाऊल टाकलं. दिशादर्शक (जीपीएस) उपग्रहांच्या मालिकेतील सातव्या आणि शेवटच्या आयआरएनएसएस - १ जी या उपग्रहाचं भारतीय अंतराळ संशोधन संस्थेमार्फत (इस्त्रो) श्रीहरीकोटा येथून यशस्वी प्रक्षेपण करण्यात आलं.

सतीश धवन अंतराळ केंद्रावरून दुपारी १२.५० च्या सुमारास पीएसएलव्ही सी ३३ मार्फत आयआरएनएसएस - १ जी या उपग्रहाचं यशस्वी प्रक्षेपण करण्यात आलं. प्रधानमंत्री नरेंद्र मोदी यांनी 'वेबकास्ट'च्या माध्यमातून उपग्रहाचे थेट प्रक्षेपण पाहिले. त्यानंतर मोदी यांनी 'इस्त्रो'चे अभिनंदन केले. आपल्या शास्त्रज्ञांकडून लोकांना मिळालेली ही सर्वात मोठी भेट आहे, असे मोदी म्हणाले.

४४.४ मीटर लांबी आणि ३२० टन वजनाच्या या ध्रुवीय उपग्रह प्रक्षेपण यानाने दुपारी १२.५० वाजता आयआरएनएसएस -१जीसोबत अंतराळात प्रस्थान केले. या उपग्रहाच्या यशस्वी प्रक्षेपणामुळं भारत आता दळणवळणासाठी स्वतंत्र उपग्रह व्यवस्था असलेल्या देशांच्या विशेष गटात सहभागी झाला आहे.