भारतीय व्यंगचित्रकाराचे न्यूयॉर्क टाइम्सला उत्तर

मटा ऑनलाइन वृत्त । नवी दिल्ली

भारतीय अवकाश संशोधन केंद्र (इस्रो)च्या मंगळायान कामगिरीवर उपहासात्मक टिप्पणी करणाऱ्या न्यूयॉर्क टाइम्सला भारतीय व्यंगचित्रकाराने व्यंगचित्राच्या माध्यमातून सडेतोड उत्तर दिले आहे.

जगातील प्रतिष्ठित असलेल्या न्यूयॉर्क टाइम्सने इस्रोच्या मंगळायान कामगिरीचे अवमूल्यन करण्याचा प्रयत्न केला होता. मंगळायान मोहिमेनंतर प्रकाशित करण्यात आलेल्या व्यंगचित्रात भारताला एका सामान्य माणसाच्या रुपात दाखवण्यात आले होते.




मंगळावरील एका घराबाहेर सामान्य माणूस गाय घेऊन आत शिरण्यासाठी दरवाज्यावर नॉक करत असल्याचे चित्र होते. तर त्या घरात अमेरिका, युरोपीयन देश दाखवण्यात आले होते. न्यूयॉर्क टाइम्सवर या व्यंगचित्रावरुन टीका करण्यात आली होती.


दोन दिवसांपूर्वीच इस्रोने १०४ उपग्रह एकाच वेळी सोडण्याचा विक्रम केला. टाइम्स ऑफ इंडियाचे व्यंगचित्रकार संदिप अधर्व्यु यांनी न्यूयॉर्क टाइम्सला त्यांच्याच भाषेत उत्तर दिले आहे. एलिट क्लबमध्ये भारत बसला असून अमेरिका आणि चीनचे प्रतिनिधी त्यांचे उपग्रह घेऊन रांगेत उभे असल्याचे दाखवण्यात आले आहे. इस्रोने सोडलेल्या १०४ उपग्रहांमध्ये तब्बल ९६ उपग्रह हे अमेरिकेचे होते.