बलात्काराच्या आरोपाखाली जैन मुनीला अटक

मटा ऑनलाइन वृत्त । अहमदाबाद

आशीर्वाद देण्याच्या बहाण्याने एका १९ वर्षीय तरुणीवर बलात्कार केल्याच्या आरोपाखाली जैन मुनी आचार्य शांती सागर महाराजला गुजरातमध्ये अटक करण्यात आली आहे. जैन मुनीला बलात्काराच्या आरोपाखाली अटक करण्यात आल्यानं जैन समाजात खळबळ उडाली आहे.

शांतीसागर महाराजचा आशीर्वाद घेण्यासाठी मंदिरात गेलेल्या मुलीला मंदिरात ठेऊन घेतले व त्यानंतर तिच्यावर बलात्कार केला, असा आरोप या तरुणीने केला आहे. ही घटना १ ऑक्टोबर रोजी घडली असून ११ दिवसांनंतर या तरुणीनं महाराजविरुद्ध पोलीस ठाण्यात तक्रार नोंदवली आहे. पीडित मुलगी आपल्या पालकासोबत महाराजचा आशीर्वाद घेण्यासाठी गेली होती. परंतु महाराजाने तिला पूजा करण्याच्या नावाखाली वेगळ्या रुममध्ये नेले व तिच्यावर बलात्कार केला. भीतीच्यापोटी पीडित तरुणीनं हा प्रकार कोणाला सांगितला नाही परंतु पालकांना विश्वासात घेतल्यानंतर पीडित तरुणीनं ११ दिवसानंतर पोलीस ठाण्यात महाराजविरुद्ध तक्रार दाखल केली.

पीडित तरुणीच्या तक्रारीनंतर महाराजविरुद्ध गुन्हा दाखल केला व मुलीची वैद्यकीय तपासणी केल्यानंतर तिच्यावर बलात्कार झाल्याचे सिद्ध झाल्याची माहिती पोलिसांनी दिली. शांतीसागर महाराजविरुद्ध गुन्हा दाखल झाल्यानंतर महाराजचे हजारो समर्थक पोलीस ठाण्यासमोर जमले होते. दरम्यान, पीडित तरुणीने तक्रारीत म्हटले की, ही घटना ९.३० ते १०.३० दरम्यान घडली. परंतु जैन मुनी हे साडे आठनंतर कोणालाही भेटत नाही. तसेच घटना घडल्यानंतर ११ दिवस मुलीने तक्रार का नाही नोंदवली, असा प्रश्न उपस्थित करीत हा सर्व आरोप निराधार असल्याचा दावा सकल दिगांबर जैन समाजाचे वकील आर. जी शाह यांनी केला आहे.