‘जैश’च्या कमांडरसह चार दहशतवादी ठार

श्रीनगर : काश्मीरमधील सुरक्षा दलांनी सोमवारी दोन वेगवेगळ्या चकमकींमध्ये चार दहशतवाद्यांना कंठस्नान घातले. त्यामध्ये जैश-ए-मोहम्मदचा वरिष्ठ कमांडर उमर खालिद तसेच काश्मिरी तरुणांना हिजबुल मुजाहिद्दीनमध्ये भरती करण्याचे काम करणारा झाहिद यांचा समावेश आहे. दरम्यान, बडगाम जिल्ह्यातील चकमकीत एक जवान शहीद झाला.

खालिद पाकिस्तानी नागरिक असून उत्तर काश्मीरमधील सुरक्षा दलांच्या तळांवरील अनेक दहशतवादी हल्ल्यांमध्ये तसेच पोलिसांवरील हल्ल्यांमध्येही त्याचा सहभाग होता. त्याच्यावर सुमारे सात लाख रुपयांचे इनाम जाहीर करण्यात आले होते.

दरम्यान, ‘भारत-पाकिस्तानच्या सीमेवर जवान दररोज पाच-सहा दहशतवाद्यांना कंठस्नान घालून दहशतवाद्यांचे मनसुबे उधळून लावत आहेत’, अशी माहिती केंद्रीय गृहमंत्री राजनाथसिंह यांनी सोमवारी दिली.