वृत्तसंस्था, नवी दिल्ली जामिया मिलिया इस्लामिया (जेएमआय) विद्यापीठातील हिंसाचारात जखमी झालेल्या विद्यार्थ्याने भरपाईच्या मागणीसाठी दिल्ली उच्च न्यायालयात धाव घेतली आहे. या प्रकरणी न्यायालयाच्या देखरेखीखाली एखाद्या समितीमार्फत किंवा विशेष तपास पथकामार्फत चौकशी केली जावी, अशी मागणीही या विद्यार्थ्याने याचिकेत केली आहे. गेल्या वर्षी डिसेंबरमध्ये नागरिकत्व दुरुस्ती कायद्याविरोधात दक्षिण दिल्लीतील जामिया नगरमध्ये करण्यात आलेल्या आंदोलनाला हिंसक वळण लागले होते. त्यानंतर पोलिसांनी जामिया विद्यापीठाच्या आवारात घुसून विद्यार्थ्यांवर लाठीमार केला होता. यात अन्य काही विद्यार्थ्यांसह मोहम्मद मिन्हाजुद्दीन जखमी झाला. मोहम्मदचा एक डोळा निकामी झाला असून दुसऱ्या डोळ्याची दृष्टी वाचवण्यासाठी त्याचा संघर्ष सुरू आहे. या प्रकरणी विद्यापीठाच्या आवारात घुसून लाठीमार केलेल्या पोलिसांवर एफआयआर दाखल करावा आणि आपल्या शैक्षणिक पात्रतेनुसार आपल्याला भरपाई म्हणून कायमस्वरूपी नोकरी मिळावी, अशी मागणी मोहम्मदने याचिकेमध्ये केली आहे. आपल्या उपचारांवर झालेला खर्च केंद्र सरकार, दिल्ली सरकार आणि पोलिसांनी उचलावा, अशी मागणीदेखील मोहम्मदने केली आहे.
'जामिया'तील जखमी विद्यार्थी भरपाईसाठी न्यायालयात
वृत्तसंस्था, नवी दिल्लीजामिया मिलिया इस्लामिया (जेएमआय) विद्यापीठातील हिंसाचारात जखमी झालेल्या विद्यार्थ्याने भरपाईच्या मागणीसाठी दिल्ली उच्च ...
महाराष्ट्र टाइम्स.कॉम 30 Jan 2020, 4:00 am