जम्मू-काश्मीर: यासीन मलिकला अटक

श्रीनगर:

जम्मू-काश्मीरमध्ये राज्यपाल राजवट लागू झाल्यानंतर पोलीस आणि लष्कराने आता कंबर कसली आहे. पोलीस आणि लष्कराने केवळ दहशतवाद्यांविरोधातच मोहीम उघडली नसून दहशतवाद्यांना मदत करणाऱ्यांभोवतीचा फासही आवळला आहे. त्या पार्श्वभूमीवर आज जम्मू-काश्मीर पोलिसांनी फुटीरतावादी नेता आणि जम्मू-काश्मीर लिबरेशन फ्रंटचा प्रमुख यासीन मलिकला अटक केली आहे.

यासीन मलिकला आज सकाळी श्रीनगरमधून ताब्यात घेण्यात आले आहे. येत्या काही दिवसात जम्मू-काश्मीरमधील फुटीरतावादी नेत्यांची पोलीस धरपकड करणार असल्याचं सूत्रांनी सांगितलं. फुटीरतावाद्यांना अटक करायची की त्यांना नजरकैदेत ठेवायचे यावर पोलिसांचा विचार सुरू असल्याचंही सांगण्यात येतं. येत्या २८ जून रोजी अमरनाथ यात्रा सुरू होणार आहे. या यात्रेवर दहशतवादी हल्ला होणार असल्याच्या पार्श्वभूमीवर पोलिसांनी मलिकला अटक केली असल्याचं सांगण्यात येतं.

राज्यपाल राजवट लागू झाल्यामुळे दहशतवाद्यांविरोधात कारवाई करताना स्थानिक नेत्यांची होणारी ढवळाढवळ थांबेल असं पोलीस सूत्रांनी सांगितलं. स्थानिक नेत्यांचा हस्तक्षेप होणार नसल्याने अतिरेक्यांविरोधातील कारवाई अत्यंत वेगाने होणार असल्याचंही पोलीस सूत्रांनी सांगितलं.