जपानच्या पंतप्रधानांचं होणार शाही स्वागत

मटा ऑनलाइन वृत्त । अहमदाबाद

महत्त्वाकांक्षी बुलेट ट्रेन प्रकल्पाचं भूमिपूजन आणि भारत-जपान वार्षिक परिषदेसाठी जपानचे पंतप्रधान शिंजो आबे आजपासून दोन दिवसांच्या भारत दौऱ्यावर येत आहेत. पंतप्रधान नरेंद्र मोदी आबे यांचे अहमदाबाद येथे स्वागत करणार आहेत. अन्य देशाच्या पंतप्रधानांचं स्वागत राजधानी दिल्लीऐवजी अहमदाबादमध्ये करत पंतप्रधानांनी आतापर्यंतच्या स्वागताची परंपरा मोडली आहे.

दुपारी ३.३० वाजता पंतप्रधान मोदी आबे यांचे विमानतळावर स्वागत करतील. अहमदाबाद विमानतळ ते आरटीओ ऑफिस असा ८ कि.मी. चा रोड शो खास जपानच्या पंतप्रधानांसाठी आयोजित करण्यात आला आहे. या रोड शोमध्ये देशातल्या २८ राज्यांचे प्रातिनीधिक चित्ररथ असतील. शाळांचे बँड्स तसेच या रस्त्यावर शेकडो मुले हातात झेंडा घेऊन पंतप्रधानांचे स्वागत करतील.

सायंकाळी ५.३५ वाजता पंतप्रधान शिंजो आबे साबरमती आश्रमाला भेट देणार आहेत. त्यानंतर सिद्दी सय्यद मशिदीला भेट असा पंतप्रधानांचा कार्यक्रम आहे. गुरुवारी पंतप्रधान आबे अहमदाबाद-मुंबई हायस्पीड रेल्वे प्रकल्पाचं भूमिपूजन करणार आहेत. या प्रकल्पासाठी जपानने भारताला आर्थिक सहकार्य केलं आहे. यानंतर गांधीनगरमधील महात्मा मंदिरात १२ वे भारत-जपान वार्षिक संमेलन होणार आहे.

या वार्षिक संमेलनानंतर दोन्ही देशांमधील संयुक्त करारांसाठी एक बैठक होईल. दोन्ही देशांमध्ये एकूण १५ करार होणार आहेत. शिंजो आबे यांचं आदरातिथ्य पंतप्रधान मोदी गुजराती थाळीसाठी प्रसिद्ध असणाऱ्या 'अगाशिये' या आलिशान हॉटेलात करणार आहेत.