जाटांचे 'दिल्ली कूच' आंदोलन स्थगित

मटा ऑनलाइन वृत्त । नवी दिल्ली

आरक्षणाच्या मागणीसाठी जाट आरक्षण संघर्ष समितीने पुकारलेले 'दिल्ली कूच' आंदोलन १५ दिवसांसाठी स्थगित करण्यात आले आहे. हरियाणा सरकारसोबत झालेल्या चर्चेनंतर आंदोलन स्थगित करण्याचा निर्णय घेण्यात आला आहे. नोकरी आणि शिक्षणात आरक्षणाच्या मागणीसाठी जाट समुदायाने दिल्लीत आंदोलन करण्याचा इशारा दिला होता.

हरियाणाचे मुख्यमंत्री मनोहर लाल खट्टर, केंद्रीय मंत्री पी.पी. चौधरी, विरेंद्र सिंह आणि जाट आंदोलनाचे नेते यांच्यात दिल्लीत बैठक झाली. जाट आंदोलनाचे नेते यशपाल मलिक यांनी सांगितले की, सरकारसोबत झालेल्या चर्चेनंतर आम्ही आंदोलन स्थगित केले आहे. सरकारवर विश्वास असून पाच मागण्यांबाबत एकमत झाले आहे. आम्ही प्रातिनिधीक स्वरूपातील आंदोलन सुरूच ठेवणार असल्याचे मलिक यांनी स्पष्ट केले.

राष्ट्रीय मागासवर्ग आयोगाचे अध्यक्ष आणि इतर सदस्यांची नेमणूक झाल्यानंतर जाट आरक्षणाची प्रक्रिया सुरू होणार असल्याचे हरियाणाचे मुख्यमंत्री मनोहर लाल खट्टर यांनी सांगितले. जाट आरक्षणाच्या मागणीसाठी २०१० साली झालेल्या आंदोलनातील जखमींना, मृतांच्या वारसदारांना नोकरी देण्याबाबत विचार करण्यात येणार असून आरोपी अधिकाऱ्यांवर कारवाई करण्यात येणार असल्याचे खट्टर यांनी सांगितले.