मक्का मशीद: जावेद अख्तर यांची NIA वर टीका

नवी दिल्ली : मक्का मशीद स्फोट प्रकरणी सर्व आरोपी निर्दोष सुटल्यानंतर प्रसिद्ध गीतकार जावेद अख्तर यांनी टि्वट करत राष्ट्रीय तपास यंत्रणेवर (एनआयए) टीका केली आहे. एनआयएला लक्ष्य करत ते म्हणाले, 'एनआयएला आता आंतर्धर्मीय विवाहांची चौकशी करण्यासाठी खूप वेळ मिळेल.' जावेद अख्तर यांच्या या वक्तव्यानंतर भाजपनेही त्यांना उत्तर देत म्हटलंय, 'काँग्रेसच्या 'हिंदू दहशतवादावर' टीका करण्याची इमानदारीही जावेद अख्तर यांनी दाखवली असती तर बरं झालं असतं.'

२००७ मध्ये झालेल्या मक्का मशीद स्फोटप्रकरणी एनआयएच्या विशेष न्यायालयाने पुराव्यांअभावी असीमानंदांसह सहा आरोपींची सुटका केली. विरोधकांनी एनआयएवर तपासात ढिसाळपणाचा आरोप केला आहे. याचसंदर्भात जावेद अख्तर यांनी टिप्पणी केली आहे. जावेद अख्तर यांनी टि्वट केलंय, 'मिशन पूर्ण झाले. मक्का मशीद प्रकरणाच्या मोठ्या यशाबद्दल एनआयएचं अभिनंदन. आता त्यांच्याकडे आंतरधर्मीय विवाहांच्या चौकशीसाठी वेळ असेल.'

केरळच्या लव्ह जिहाद प्रकरणाचा तपासही एनआयए करत आहे. जावेद अख्तर यांच्या या टि्वटला भाजप प्रवक्ता जीव्हीएल नरसिंह राव यांनी टि्वटनेच प्रत्युत्तर दिलं आहे. 'जावेद जी, तुम्ही 'हिंदू दहशतवादासाठी' काँग्रेसवर टीका करायला हवा होती. तुम्ही सिनेमात जशी स्क्रीप्ट लिहिता त्यावरून राहुल गांधी यांनी प्रेरणा घेतल्याचे दिसते.. की तुमचीच कथित संकल्पना 'मौत का सौदागर' प्रमाणे हिंदू दहशतवादही तुमचं ब्रेनवेव्ह आहे?'