सीमेवरील चकमकीत २४ वर्षीय जवान शहीद

मटा ऑनलाइन वृत्त। जम्मू

जम्मूतील राजौरी भागात नियंत्रण रेषेजवळ पाकिस्तानी सैनिकांनी शत्रसंधीचे उल्लंघन करत केलेल्या गोळीबारात एक भारतीय जवान शहीद झाला आहे. पाकिस्तानने काल ( रविवारी) संध्याकाळी केलेले शस्त्रसंधीचे उल्लंघन हे १२ तासांत केलेले दुसरे उल्लंघन आहे.

लष्कराचे प्रवक्ता लेफ्टनंट कर्नल मनीष मेहता यांनी पाक सैनिकांनी केलेल्या गोळीबारात एक भारतीय जवान शहीद झाल्याच्या वृत्ताला दुजोरा दिला आहे. याबाबत माहिती देताना मेहता म्हणाले, राजौरी भागात नियंत्रण रेषेजवळ पाकिस्तानने शत्रसंधीचे उल्लंघन केले. त्यानंतर झालेल्या चकमकीत भारतीय जवान, शिपाई सुदीस कुमार शहीद झाले. शहीद सुदीस कुमार हे उत्तर प्रदेशातील संभल जिल्ह्यातील असल्याची माहितीही मेहता यांनी दिली.

शहीद सुदीस कुमार हे केवळ २४ वर्षांचे होते. आपल्या पत्नीला मागे ठेवून त्यांनी देशासाठी आपले बलिदान दिले आहे अशी माहिती प्रवक्ता मेहता यांनी दिली. पाकिस्तानने काल संध्याकाळी शस्त्रसंधीचे उल्लंघन केल्यानंतर केलेल्या गोळीबाराला प्रत्युत्तर देताना ५ वाजण्याच्या सुमाराला सुदीस कुमार शहिद झाले. भारतीय जवानांनी या हल्ल्याला चोख प्रत्युत्तर दिल्याचेही मेहता म्हणाले.

रविवारच्या सकाळी पाकिस्तानी सैनिकांनी शस्त्रसंधीचे उल्लंघन करत सीमेवरील नौशेरा भागात गोळीबार केला होता. त्यावेळी हल्ल्यात भारतीय जवान जखमी वा शहीद झाल्याचे कोणते वृत्त नव्हते.