जेट एअरवेजने कापला कर्मचाऱ्यांचा पगार

नवी दिल्ली :

जेट एअरवेजने आपल्या कर्मचाऱ्यांच्या पगारात २५ टक्क्यांपर्यंत कपात करण्याचा निर्णय घेतला आहे. ज्यांचं वार्षिक पॅकेज १२ लाख रुपयांपर्यंत आहे त्यांच्या पगारात पाच टक्के तर १ कोटी रुपये किंवा त्याहून अधिक पॅकेज असणाऱ्यांचा पगार २५ टक्क्यांपर्यंत कमी होणार आहे. इंधनदरवाढ, रुपयाची घसरण आदींच्या परिणामाने ऑपरेशनल कॉस्ट वाढल्याने कंपनीनी पगार कपातीचा निर्णय घेतला आहे.

'ही पगारकपात कधीपर्यंत केली जाणार आहे हे अद्याप स्पष्ट नाही. कपात केलीला पगार परत केला जाणार की नाही हेही सांगण्यात आलेली नाही,' असं जेट एअरवेजच्या सूत्रांनी सांगितलं. एअरलाइनच्या व्यवस्थापनाने कर्मचाऱ्यांसोबत बैठक घेऊन त्यांना पगारकपातीची माहिती दिली.

वैमानिकाच्या वेतनात सुमारे १७ टक्के कपात करण्यात आली आहे. जेट एअरवेज कर्मचाऱ्यांच्या पगारावर वार्षिक सुमारे ३ हजार कोटी रुपये खर्च करते. हे पगारकपातीचं पाऊल उचलल्याने हा खर्च सुमारे ५०० कोटी रुपयांनी कमी होणार आहे. कंपनीने मागील वर्षीदेखील जवळपास ३५० कनिष्ठ वैमानिकांच्या वेतन आमि अन्य भत्त्यांमध्ये ३० टक्के कपात केली होती.

या पगारकपातीला कर्मचाऱ्यांकडून विरोध होऊ शकतो. एक वरिष्ठ वैमानिक म्हणाले, 'कंपनीच्या या निर्णयाचा पायलट विरोध करणार कारण सर्व अन्य एअरलाइन्स कर्मचाऱ्यांचा पगार वाढवत असताना आमचा पगार कापला जात आहे.'