मूल विकण्यासाठी 'तिच्या'वर बलात्कार

मटा ऑनलाइन वृत्त । नवी दिल्ली

झारखंडच्या सिमडेगा जिल्ह्यातील एका महिलेला गर्भवती करून तिचे मूल विकण्यासाठी या महिलेवर दोन दिवस बलात्कार करण्यात आल्याची धक्कादायक घटना घडली आहे. दिल्लीतील एका प्लेसमेंटच्या मालकाने पीडित महिलेला गर्भ ठेवण्यासाठी जोरजबरदस्ती करत प्रचंड मारहाण केली. त्यानंतर प्लेसमेंटच्या एका कर्मचाऱ्याने तिच्यावर दोन दिवस बलात्कार केल्याने या महिलेला गर्भधारणा झाल्याचे उघडकीस आले आहे.

पीडित महिलेने तिच्याबरोबर असलेल्या पश्चिम बंगालच्या एका महिलेसोबत प्लेसमेंट एजन्सीमधून पलायन करून दिल्लीतील महिला आयोगाचं कार्यालय गाठलं. त्यामुळे हा माणुसकीला काळीमा फासणारा प्रकार समोर आला आहे. ही महिला गर्भवती असून तिच्या पोटात दीड महिन्याचं मूल असल्याचं तिनं आयोगाला सांगितलं. जन्माला येणाऱ्या मुलांना विकण्याचा या एजन्सीच्या मालकाचा धंदा होता, असे या महिलेने आयोगाला सांगितले. त्यानंतर आयोगाचे एक पथक दिल्ली पोलिसांसोबत एजन्सीमध्ये गेले आणि दोन एजंटांना ताब्यात घेतले. यावेळी ६ महिलांनाचीही या एजन्सी मालकाच्या ताब्यातून सुटका करण्यात आली. यातील काही महिला गर्भवती असल्याचं आढळून आलं आहे. एजन्सीच्या मालकाला अटक करण्यात आली असून त्याच्याविरोधात गुन्हा दाखल करण्यात आला आहे.

नोकरीसाठी आली आणि फसली

नोकरी मिळवून देतो असे सांगत विरेंद्र साहू नावाच्या एका व्यक्तीने या महिलेला सिमडेगाहून दिल्लीत आणले होते. सुरुवातीला तिला शकरपूरच्या एका प्लेसमेंट एजन्सीमध्ये ठेवण्यात आले. तिथे तिचा फोन नंबर आणि आधार कार्ड घेण्यात आले. त्यानंतर तिला निहाल विहार येथील आरती प्लेसमेंट एजन्सीमध्ये नेण्यात आले. आरती आणि तिचे पती बाबू राज हे ही एजन्सी चालवतात, असं या महिलेनं आयोगाला सांगितलं. 'गर्भ ठेवण्यास नकार दिला तेव्हा मला मारहाण करण्यात आली. एका एजंटने माझ्यावर दोन दिवस वारंवार बलात्कार केला. त्यामुळे मला गर्भ राहिला. एजन्सीचा मालक एका गर्भवती महिलेला रुग्णालयात घेऊन जात असताना दरवाजाला कुलूप लावायला विसरल्याने तिथून पळ काढता आल्याचं या महिलेनं स्पष्ट केलं.