बेरोजगार तरुणाला १.२ कोटींची नुकसानभरपाई

मटा ऑनलाइन वृत्त | मुंबई

सात वर्षांपूर्वी रस्ते अपघातात आईवडिलांना गमावणाऱ्या तरुणाला नुकसानभरपाई म्हणून १ कोटी २० लाख रुपये देण्याचे आदेश मोटर अपघात दावा न्यायाधिकरणानं दिले आहेत. संबंधित तरुण बेरोजगार असून तो उच्च शिक्षण घेत आहे.

मुंबई-ठाणे महामार्गावर २८ ऑक्टोबर २०१० रोजी एका ट्रकने कारला धडक दिली होती. या अपघातात विनीत गावकर याचे वडील हरीश आणि आई संजीवनी यांच्यासह एका नातेवाईकाचा मृत्यू झाला होता. हा अपघात ट्रक चालकाच्या निष्काळजीपणामुळं झाला होता, असं सांगितलं जातं. विनीतनं ट्रक मालक, चालक बरकतुल्लाह खान आणि ओरिएंटल विमा कंपनीविरोधात डिसेंबरमध्ये तक्रार दाखल केली होती. या प्रकरणावर न्यायाधिकरणात नुकतीच सुनावणी घेण्यात आली. कोणतेही संकेत न देता महामार्गावर ट्रक उभा केल्यानं अपघात झाल्याचं सिद्ध झालं. न्यायाधिकरणानं विनीतच्या आईवडिलांचं वार्षिक उत्पन्न आणि गेल्या सात वर्षांतील हिशेबाप्रमाणे व्याजाची रक्कम अशी नुकसानभरपाई देण्याचे आदेश संबंधितांना दिले. विशेष म्हणजे विनीत उच्च शिक्षण घेत असल्याने नुकसानभरपाई मिळवण्यास पात्र ठरला.