Jodhpur: अभिनेत्री तब्बूसोबत गैरवर्तन

जोधपूर : १९ वर्षांपूर्वी घडलेल्या काळवीट शिकारप्रकरणाचा उद्या निकाल येणार असल्याने त्याच्या सुनावणीसाठी जोधपूरला आलेली अभिनेत्री तब्बूसोबत विमानतळावर एका इसमाने गैरवर्तन केल्याची धक्कादायक घटना घडली आहे. मात्र तब्बूच्या अंगरक्षकांनी प्रसंगावधान राखून त्या व्यक्तीला तात्काळ तिथून हाकलले.

काळवीट शिकार प्रकरणाच्या सुनावणीसाठी तब्बू मुंबईवरून जोधपूरला पोहोचली होती. तिच्यासोबत तिचे अंगरक्षकही होते. तब्बू विमानतळावरून बाहेर पडत असताना एक व्यक्ती तिचा अंगरक्षक बनून तिच्या अंगरक्षकांच्या ताफ्यात घुसला. त्यानंतर त्याने तब्बूला स्पर्श करण्याचा प्रयत्न केला. त्यामुळे तब्बू संतापल्याने तिच्या अंगरक्षकाने या व्यक्तीला तिथून हाकलून लावले. दरम्यान, या प्रकरणी तब्बूने कोणतीही तक्रार दाखल केलेली नाही.

१९ वर्षांपूर्वी म्हणजे १९९८ मध्ये 'हम साथ साथ हैं' या चित्रपटाच्या चित्रीकरणासाठी अभिनेता सलमान खान जोधपूरला आला होता. त्यावेळी काळवीटाची शिकार केल्याचा त्याच्यावर आरोप ठेवण्यात आला आहे. त्याच्या जीप्सीमध्ये अभिनेत्री निलम, तब्बू, सोनाली बेंद्रे आणि अभिनेता सैफ अली खानही होता. शिकार करण्यासाठी सलमानला भरीस घातल्याचा या कलाकारांवर आरोप ठेवण्यात आला आहे. उद्या गुरूवारी ५ एप्रिल रोजी याप्रकरणावर जोधपूर न्यायालयात सुनावणी होणार आहे. जोधपूर ग्रामीण जिल्हा मुख्य न्यायदंडाधिकारी देवकुमार खत्री हे या प्रकरणावर निर्णय देणार आहेत.