ट्रकचालकाच्या दोन्ही मुलांनी मारली जेईईत बाजी

जयपूर:

राजस्थानमध्ये एका ट्रकचालकाच्या दोन्ही मुलांनी कठोर मेहनतीच्या जोरावर जेईई-ए आणि नीटच्या परीक्षेत घवघवीत यश मिळविले आहे. शिक्षणासाठी शहरात जात असताना कपडे सुद्धा उधारीवर घ्यावे लागलेल्या या दोन्ही भावांच्या यशामुळे त्यांच्यावर कौतुकाचा वर्षाव होत आहे.

मंगनाराम बिश्नोई असं या ट्रकचालकाचं नाव असून महेंद्र कुमार बिश्नोई आणि श्यामसुंदर बिश्नोई अशी त्यांच्या मुलांची नावं आहेत. ते जोधपूरच्या फालदोई तालुक्यातील कंसार गावचे रहिवासी आहेत. गेल्या वर्षभरापासून महेंद्रने नीटच्या परीक्षेचा तर श्यामने जेईई-एच्या परीक्षेचा कसून सराव केला होता. या वर्षभरात ते एकदाही घरी गेले नाही. शहरात राहूनच त्यांनी अभ्यास पूर्ण करत नेत्रदीपक यश मिळविलं आहे. महेंद्रला नीटमध्ये ५१४० वी रँक मिळाली असून श्यामला जेईई-अॅडव्हान्स्डमध्ये १५,९४९ वी रँक मिळाली आहे.

मंगनाराम यांनाही वर्षभर मुलांना भेटता आलं नव्हतं. ट्रकचालक असल्याने नेहमीच बाहेर रहावं लागत असल्यानं त्यांना मुलांना भेटता आलं नाही. मंगनाराम यांची आर्थिक स्थिती बेताचीच आहे. दोन्ही मुलांना कोटा येथे पुढील शिक्षणासाठी पाठवण्याकरिता त्यांच्याकडे पैसे नव्हते. त्यामुळे त्यांना बँकेतून कर्ज घ्यावे लागले. कोटा येथे जाताना कपडे, भांडे आणि बॅग सुद्धा उधारीवर घ्याव्या लागल्या होत्या, असं महेंद्रने सांगितलं. इंजिनियरिंग आणि वैद्यकीय महाविद्यालयात जाण्यापूर्वी त्यांना त्यांच्या वडिलांना भेटायचं आहे. शिक्षणासाठी घेतलेलं कर्ज फेडणं आणि वडिलांना ट्रक चालवण्याची वेळ येऊ न देणं याला पहिलं प्राधान्य देणार असल्याचं या दोघांनी सांगितल.

ही बातमी इंग्रजीत वाचण्यासाठी इथे क्लिक करा: