माजी न्यायाधीश लैला सेठ यांचे निधन

मटा ऑनलाइन वृत्त । नवी दिल्ली

दिल्ली हायकोर्टाच्या पहिल्या महिला न्यायाधीश लैला सेठ (८६ वर्ष) यांचे नोएडातील राहत्या घरी दीर्घ आजाराने निधन झाले. सुप्रसिद्ध लेखक विक्रम सेठ यांच्या त्या मातोश्री होत्या.

लैला सेठ यांनी १९५८ साली लंडनमध्ये विधी परिक्षेत त्यांनी अव्वल क्रमांक पटकावला होता. या परिक्षेत अव्वल क्रमांकाने पास होणाऱ्या त्या पहिल्या महिला ठरल्या. त्यानंतर पटना हायकोर्टात वकिली व्यवसायाला सुरूवात केली. लैला सेठ यांची १९७८ साली दिल्ली हायकोर्टाच्या न्यायाधीशपदी नेमणूक करण्यात आली. त्यानंतर १९९१ साली हिमाचल प्रदेश हायकोर्टाच्या मुख्य न्यायाधीशपदी त्यांची नेमणूक करण्यात आली. हायकोर्टाच्या मुख्य न्यायाधीशपदी नेमणूक होणाऱ्या त्या महिला न्यायाधीश ठरल्या. लैला सेठ यांची विधी आयोगात २००० साली नेमणूक करण्यात आली होती. हिंदू वारसा हक्क कायद्यात महत्त्वाचे बदल करण्यात त्यांची मोठी भूमिका होती. या बदलामुळे एकत्रित कुटुंबात मुलींनाही संपत्तीचा अधिकार मिळाला.