ओरडा पडतो म्हणून मुलानं आईला जिवंत जाळलं

मटा ऑनलाइन वृत्त। चेन्नई

बेकार असल्याच्या कारणावरून आई ओरडल्याचा राग येऊन एका अल्पवयीन मुलानं आपल्या आईलाच जिवंत जाळल्याची संतापजनक घटना तिरूसूलममध्ये घडली. पोलिसांनी या प्रकरणी या अल्पवयीन मुलाला अटक केली आहे.

३८ वर्षीय वेलुताई चेन्नई विमानतळावर हाऊसकीपरची नोकरी करत होत्या. त्यांना एकूण तीन मुलं आहेत. त्यांमध्ये आरोपी मुलाचा क्रमांक दुसरा आहे. त्यांचा थोरला मुलगा ट्रक चालक आहे, तर छोटा मुलगा सुरेश केवळ दोनच वर्षांचा आहे. वेलुताईंचा नवरा मुरूगन दिहाडी हा मजूर आहे.

पोलिसांनी दिलेल्या माहितीनुसार, आपल्या दुसऱ्या मुलानं नोकरी करावी असं वेलुताईंना वाटत होतं. त्यावरून या बेकार मुलाला वेलुताई टोचून बोलत असत. रविवारी रात्री या मुलानं आपल्या आईकडे पैसे मागितले. त्यावेळी त्याची आई स्वयंपाकघरात काम करत होती. पैसे मागितल्यामुळं वेलुताई त्याला ओरडल्या. त्यानंतर चिडलेल्या मुलानं आपल्या आईच्या अंगावर रॉकेल शिंपडून आग लावली.

ही घटना घडली त्यावेळी वेलुताईंची इतर मुलं घरी नव्हती. वेलुताईंनी केलेली आरडाओरड ऐकून बाहेरचे लोक पळत आत आले. त्यांनी आग विझवली आणि वेलुताईंना तातडीनं हॉस्पिटलमध्ये नेलं. मात्र त्या खूपच जळाल्यामुळं हॉस्पिटलमध्येच त्यांचा मृत्यू झाला.

या प्रकरणी पोलिसांनी आरोपी मुलाची बालसुधार गृहात रवानगी केली आहे.