केसीआर व्यंकटेश्वरास अर्पण करणार ५ कोटींचे दागिने

मटा ऑनलाइन वृत्त। विजयवाडा

तेलंगणचे मुख्यमंत्री के. चंद्रशेखर राव प्रसिद्ध तिरुपती मंदिरात ५ कोटी रुपये किंमतीचे दागिने चढवणार आहेत. याबाबत प्रसिद्ध झालेल्या वृत्तानुसार तेलंगण हे स्वतंत्र राज्य स्थापन व्हावे यासाठी के. चंद्रशेखर राव यांनी भगवान व्यंकटेश्वराला नवस केला होता. उद्या बुधवारी सकाळी ५ कोटींचे दागिने अर्पण करून ते आपला नवस फेडणार आहेत.

मुख्यमंत्री झाल्यानंतर राव यांची व्यंकटेश्वराच्या मंदिराला भेट देण्याची ही पहिलीच वेळ आहे.



राव आपला नवस फेडताना जे दागदागिने अर्पण करणार आहेत त्या दागिन्यांचे फोटो प्रसिद्ध झाले आहेत. या दागिन्यांमध्ये हिऱ्यांनी मढवलेल्या सोन्याच्या 'शालीग्राम हरम'चा समावेश आहे. शिवाय 'मकर कंठी' आणि इतर अनेक दागिन्यांचा समावेश आहे. राव भगवान व्यंकटेश्वराला सोन्याचा शालीग्राम हरम अर्पण करतील, तर देवी पद्मावतीला 'मकर कंठी' अर्पण करणार आहेत अशी माहिती तेलंगण सरकारचे सल्लागार के. व्ही.रमणचारी यांनी दिली.



राव मंगळवारच्या संध्याकाळी बेगमपेठहून एका विशेष विमानाने तिरुपतीच्या दर्शनासाठी रवाना होतील. ते आंध्रप्रदेश राज्याचे पाहुणे असणार आहेत. राव यांच्याबरोबर त्यांचे कुटुंबीय आणि मंत्रिमंडळातील काही मंत्रीही असणार आहेत. राव यांनी यापूर्वी आध्र प्रदेश आणि तेलंगणमधील अनेक मंदिरांना महागड्या भेटी अर्पण केलेल्या आहेत.