२१ महिने होते मंत्री, आज पहिल्यांदा बोलले!

नवी दिल्ली:

राज्यसभेत माजी पर्यटन मंत्री के. जे. अल्फोन्स बुधवारी भाषणाला उभे राहिले आणि सदस्यांनी त्यांचे बाकं वाजवून जोरदार स्वागत केले. कारणही तसंच होतं. राष्ट्रपतींच्या अभिभाषणावर होणाऱ्या चर्चेत सहभागी होताना अल्फोन्स यांनी स्पष्ट केलं की ते सभागृहात पहिल्यांदाच बोलत आहेत. ते म्हणाले, मी भलेही २१ महिने पर्यटन मंत्री होतो, पण तेव्हा मला बोलण्याची संधीच मिळाली नाही. हे माझं पहिलंच भाषण आहे, असं म्हणताच सदस्यांनी बाकं वाजवून त्यांचं स्वागत केलं.

अल्फोन्स यांनी आपल्या पहिल्या भाषणात पंतप्रधान मोदींचं कौतुक केलं. भारतीय पर्यटन क्षेत्राचे मोदी हे ब्रँड एम्बेसेडर आहेत, असं ते म्हणाले. मोदी सरकारच्या काळात कोणती कामं झाली तीही अल्फोन्स यांनी सांगितली. ते म्हणाले, 'आधी २८ टक्के लोकांसाठी शौचालयाची सुविधा होती, ती आता ९९.२ टक्के लोकांना मिळू लागली आहे. ३५ कोटी भारतीयांची बँक खाती उघडली आणि त्या, ७ लाख ३० हजार कोटी रुपये जमा झालेत. सर्व गावांपर्यंत वीज पोहाचली.'

अल्फोन्स यांचं भाषण संपताच समाजवादी पक्षाचे नेते रामगोपाल यादव आपल्या जागेवर उभे राहिले आणि सभागृहात बसलेल्या गृहमंत्री अमित शाहंकडे इशारा करत अल्फोन्स यांना पुन्हा मंत्री करा असं सांगितलं.