कनिकामुळे राजकीय वर्तुळावर दहशत
करोनाची बाधा होऊनही पार्टी, अनेक सेलेब्रिटींचा समावेश मटा...
करोनाची बाधा होऊनही पार्टी, अनेक सेलेब्रिटींचा समावेश
म.टा.विशेष प्रतिनिधी
नवी दिल्ली
लंडनहून भारतात परतल्यानंतर बडे राजकीय नेते आणि संसद सदस्यांसोबत पार्ट्या करणाऱ्या गायिका कनिका कपूरला करोनाची बाधा झाल्याचे उघड झाल्यामुळे दिल्लीतील राजकीय वर्तुळाला शुक्रवारी धडकी भरली. कनिका कपूरच्या निष्काळजीपणाचा फटका बसून लोकसभा आणि राज्यसभेच्या खासदारांनी स्वतःला विलग करून घेतले. यामुळे संसदेच्या अर्थसंकल्पीय अधिवेशनाला फटका बसण्याची शक्यता आहे. संसदेचे अधिवेशन कुठल्याही स्थितीत पूर्वनियोजित तीन एप्रिलपूर्वी गुंडाळले जाणार नाही, असा निर्धार पंतप्रधान नरेंद्र मोदी यांनी केला होता. पण या घडामोडीमुळे संसदेच्या अधिवेशनावर आता प्रश्नचिन्ह लागले आहे.
लंडनहून ९ मार्च रोजी लखनौमध्ये परत आल्यानंतर कनिका कपूरने एका अपार्टमेंटमध्ये मुक्काम केला आणि ताज हॉटेलमधील पार्टीत सहभागी झाली होती. या पार्टीत राजस्थानच्या माजी मुख्यमंत्री वसुंधरा राजे शिंदे, लोकसभेतील त्यांचे खासदारपुत्र दुष्यंत सिंह आणि स्नुषा निहारिका उपस्थित होत्या. दुष्यंत सिंह यांच्या सासरच्या मंडळींनी या पार्टीचे आयोजन केले होते. उत्तर प्रदेशचे आरोग्य मंत्री जयप्रताप सिंह, काँग्रेसचे माजी खासदार जितीन प्रसादही या पार्टीत गेले होते. कनिका कपूरला चार दिवसांपूर्वी करोनाची बाधा झाल्याचे उघड झाल्यानंतर आता या सर्वांनी स्वतःहून विलग राहण्याचा निर्णय घेतला आहे. दुष्यंत सिंह यांच्या संपर्कात आलेले राज्यसभेतील तृणमूल काँग्रेसचे नेते डेरेक ओब्रायन, काँग्रेसचे खासदार दीपेंद्र हुड्डा, भाजपचे खासदार वरुण गांधी, माजी केंद्रीय मंत्री अनुप्रिया पटेल यांनीही स्वतःला विलग करण्याचा निर्णय घेतल्यामुळे करोना व्हायरस आता संसद भवनाच्या उंबरठ्यावर पोहोचल्याचे स्पष्ट झाले आहे. कनिका कपूरसोबत पार्टीत कोण कोण होते, याची माहिती घेतली जात असून राजकीय वर्तुळात या घडामोडीमुळे घबराट निर्माण झाली आहे.
लंडनहून परतलेली कनिका कपूर विमानतळावर थर्मल स्क्रिनिंगला सामोरी गेली नसल्याचे उघड झाल्यानंतर आरोग्य पथकाने तिचा नमुना घेतला आणि शुक्रवारी तिला करोनाची बाधा झाल्याचे निष्पन्न झाले. दरम्यान, कनिका लखनौच्या ताज हॉटेलमध्ये १४ ते १६ मार्चदरम्यान मुक्कामाला होती आणि त्यानंतर एका पार्टीतही सामील झाली होती. कनिका सध्या लखनौमध्ये एका रुग्णालयात उपचार घेत आहे. या वृत्तानंतर वसुंधरा राजे यांनी ट्वीट करून आपण तसेच दुष्यंत विलग झालो असल्याची माहिती दिली आहे. या पार्टीनंतर दुष्यंत सिंह गुरुवार आणि शुक्रवारी संसदेत होते. आपण दुष्यंत सिंह यांच्या शेजारी अडीच तास बसलो होतो, असे मान्य करून डेरेक ओब्रायन यांनीही स्वतःला विलग करून घेत असल्याचे जाहीर केले. आपल्यासोबत आणखी दोन खासदार होते आणि त्यांनीही विलग करून घेतले आहे, अशीही माहिती ओब्रायन यांनी ट्विटरवर दिली. करोनापासून बचाव करण्यासाठी पंतप्रधान मोदी सर्वांना विलग राहण्यास सांगत असले तरी संसदेचे अधिवेशन सुरू ठेवून आम्हा सर्वांना संकटात लोटत असल्याची टीकाही ओब्रायन यांनी केली आहे. संसदेचे अधिवेशन तहकूब करण्यात यावे, अशी मागणी त्यांनी केली आहे. परराष्ट्र राज्यमंत्री व्ही. मुरलीधर तसेच राज्यसभेचे सदस्य व माजी केंद्रीय मंत्री सुरेश प्रभू यांनी यापूर्वीच दिल्ली येथील निवासस्थानी स्वतःला १४ दिवसांसाठी विलग करुन घेतले आहे.