केजरीवालांचे हवाला कनेक्शन, मिश्रांचा आरोप

मटा ऑनलाइन वृत्त । नवी दिल्ली

आम आदमी पार्टीचे नेते आणि दिल्लीचे मुख्यमंत्री अरविंद केजरीवाल यांचे हवाला कनेक्शन असल्याचा गंभीर आरोप आपचे बडतर्फ नेते कपिल मिश्रा यांनी केला आहे. तसेच केजरीवाल आणि 'आप'ची मी वारंवार पोलखोल करत असल्याने माझा खून केला जाऊ शकतो, अशी भीतीही त्यांनी व्यक्त केली.

कपिल मिश्रा यांनी पत्रकार परिषद घेऊन आज पुन्हा एकदा अरविंद केजरीवाल यांच्यावर टीकास्त्र सोडले. केजरीवाल यांचे हवाला कनेक्शन असून यापूर्वी असा घोटाळा कधीच झाला नव्हता. आपच्या सदस्यांच्या परदेश दौऱ्याची माहिती उघड झाली तर केजरीवाल यांना देश सोडून पळावे लागेल, असा दावा कपिल मिश्रा यांनी केला.

केजरीवाल आणि त्यांच्या सहकाऱ्यांनी व्हायरल केलेला मुकेश कुमार नावाच्या व्यक्तिचा व्हिडिओ बनावट असल्याचंही त्यांनी सांगितलं. हेमप्रकाश शर्मा नावाच्या व्यक्तिला वाचविण्यासाठीच केजरीवालने मुकेश कुमारला पुढे केले आहे. पक्षाने घरीच कंपन्यांचे बनावट लेटरहेड तयार केले. तसेच ज्या सनविजय कंपनीकडून देणगी घेतल्या गेली त्या कंपनीच्या लेटरहेडवरील मुकेश कुमारची सही सुद्धा खोटी असल्याचा दावा मिश्रा यांनी केला. केजरीवाल आणि त्यांच्या सहकाऱ्यांवर आपण सतत आरोप करत असून त्यांची पोलखोल करत असल्याने आपली हत्या केली जाऊ शकते, असा आरोपच मिश्रा यांनी केला आहे.

केजरीवाल म्हणतात पक्षाला निधी कुठून आला माहित नाही. पण त्यांनी २ कोटी रूपयांची देणगी कुठून मिळाली हे आयकर विभागाला सांगावं. दिल्ली पालिका निवडणुकीपूर्वी ही देणगी देण्यात आल्यानं केजरीवाल सांगतात ती तारिख खोटी आहे. शिवाय जेंव्हा पक्षाला देणगी मिळाली तेंव्हा मुकेश कुमार कंपनीत रूजूही झालेले नव्हते, मग त्या लेटरहेडवर त्यांची सही आली कुठून? असा सवाल मिश्रा यांनी केला आहे. केजरीवाल जी कंपनी दहा वर्षापासून सुरू आहे असं म्हणतात ती कंपनीच अस्तित्वात नाही. कंपनीच्या नावाने दाखविण्यात आलेले दस्ताऐवजही बनावट आहेत, असा दावाही त्यांनी केला.