'आप' सोडणार नाही तर 'साफ' करणारः कपिल

मटा ऑनलाइन वृत्त । नवी दिल्ली


दिल्ली सरकारमधून निलंबित करण्यात आलेले मंत्री कपिल मिश्रा यांनी सत्ताधारी आम आदमी पार्टीच्या काही भ्रष्टाचारी लोकांना बाहेरचा रस्ता दाखवण्यासाठी 'लेट्स क्लीन अप' मोहिम सुरू केली आहे. मंत्रिपदावरून निलंबित करण्यात आल्यानंतर कपिल मिश्रा यांनी मुख्यमंत्री अरविंद केजरीवाल यांच्यावर गंभीर आरोप केले आहेत.

'आप' पक्षातील आपल्या कोणत्याही समर्थकांनी पक्ष सोडू नये, असे आवाहन कपिल मिश्रा यांनी केले आहे. पक्षातील भ्रष्ट लोकांना बाहेरचा रस्ता दाखवून आपल्याला पक्षावर नियंत्रण मिळवायचे आहे. पक्षाला सोडचिठ्ठी देणाऱ्या आणि पक्षातील कार्यकर्त्यांना माझी विनंती आहे की, 'कोणीही पक्ष सोडू नये. पक्षातील भ्रष्ट लोकांना हाकलण्यासाठी 'लेट्स क्लीन अप' मोहिम सुरू करीत असल्याचेही त्यांनी यावेळी सांगितले. यावेळी सर्वांनी एकत्र येऊन पक्षाला 'साफ' करण्यासाठी पुढाकार घ्यावा, असेही ते यावेळी म्हणाले.

संजय सिंह, आशीष खेतान, विभव कुमार, दुर्गेश पाठक आणि दिलीप पांडे यांनी पक्षावर कब्जा मिळवल्याचा आरोप मिश्रा यांनी केला. 'आप'चे माजी नेते आणि स्वराज इंडिया पार्टीचे संस्थापक प्रशांत भूषण आणि योगेंद्र यादव यांची माफी मागायलाही कपिल मिश्रा विसरले नाहीत. मी प्रशांत भूषण आणि योगेंद्र यादव यांची माफी मागतो. कारण मुख्यमंत्री अरविंद केजरीवाल यांच्यासोबत राहून मी तुमच्यावर अन्याय केला, असे कपिल मिश्रा म्हणाले.

आपण सर्वांनी देशातील भ्रष्टाचार संपवण्यासाठी 'आप' पक्षाची स्थापणा केली होती. त्यामुळे पक्ष सोडण्याची ही वेळ नाही. उलट यावर नियंत्रण मिळवण्याची ही योग्य वेळ आहे. भ्रष्टाचारविरोधात लढण्यासाठी मला ७८६३०३७३०० या क्रमांकावर मिस्ड कॉल द्या, असे आवाहन केले. भ्रष्टाचारमूक्त दिली आणि केजरीवाल मूक्त दिली हवी असेल तर या आंदोलनात सहभागी व्हावे असे आवाहनही त्यांनी आपल्या समर्थकांना यावेळी केले.