शहीद पित्याच्या बटालियनमध्येच मुलगा रूजू

मुजफ्फरनगर:

१२ जून १९९९ रोजी कारगिल युद्धात शत्रूंशी लढताना राजपूताना रायफल्सच्या दुसऱ्या बटालियनमधील लान्स नायक बच्चन सिंह शहीद झाले होते. याच शहीद जवानाचा मुलगा हितेश कुमार लष्करात भरती झाला आहे. आता तो वडिलांच्याच बटालियनमध्ये लेफ्टनंटपदावर रूजू होणार आहे.

देहरादूनस्थित इंडियन मिलिटरी अॅकॅडमीतून हितेश कुमारनं प्रशिक्षण पूर्ण केलं आहे. शनिवारी 'पासिंग आऊट परेड'नंतर त्यानं मुजफ्फरनगरमधील सिव्हिल लाईन्समधील शहीद बच्चन सिंह यांच्या पुतळ्याला अभिवादन करून श्रद्धांजली वाहिली. '१९ वर्षांपूर्वी लष्करात भरती होण्याचं स्वप्न पाहिलं होतं. माझ्या आईचंही हेच स्वप्न होतं. आता ते पूर्ण झालं असून, प्रामाणिकपणे देशाची सेवा करायची आहे,' असं हितेश कुमारनं सांगितलं. 'पती बच्चन सिंह शहीद झाल्यानंतर आयुष्य जगणं कठीण झालं होतं. माझं संपूर्ण आयुष्य दोन्ही मुलांचं पालनपोषण करण्यात घालवलं. हितेश लष्करात भरती झाल्याचा अभिमान आहे. यापेक्षा अधिक मला काही नको. माझा लहान मुलगा हेमंत लष्करात भरती होण्यासाठी मेहनत करत आहे,' अशी भावनिक प्रतिक्रिया हेमंत कुमारच्या आईनं व्यक्त केली.