मुलीने आईला दिला नवा जन्म; महिलेला सर्पदंश, लेकीने मुखावाटे विष शोषलं, डॉक्टरही म्हणाले वाह!

बंगळुरु : सर्पदंश झालेल्या आईचा जीव तिच्या महाविद्यालयीन लेकीने वाचवला. श्रम्या राय नामक कॉलेज विद्यार्थिनीने आपल्या आईच्या पायात भिनलेले विष मुखावाटे शोषून बाहेर काढले. कर्नाटकातील दक्षिण कन्नड जिल्ह्यातील पुत्तूर येथे ही रोमांचक घटना घडली. शौर्य आणि प्रसंगावधानाबद्दल श्रम्याचे अत्यंत कौतुक केले जात आहे. बहादूर श्रम्या ही पुत्तूर येथील विवेकानंद पदवी महाविद्यालयाची विद्यार्थिनी आहे तर तिची आई ममता राय पुत्तूरमधील केयूर येथील ग्रामपंचायत सदस्या आहे.

ममता राय पुत्तूरमध्येच असलेल्या त्यांच्या आईच्या फार्महाऊसवर गेल्या होत्या. तिथे पाण्याचा पंप चालू करण्यासाठी त्या शेतात गेल्या. मात्र परत येताना चुकून त्यांचा पाय एका सापावर पडला. त्यामुळे सापाने त्यांच्या पायाचा चावा घेतला. आपल्याला विषारी साप चावल्याचे लक्षात येताच त्यांनी दंश झालेल्या ठिकाणी कोरड्या गवताची गाठ बांधली, जेणेकरून विष शरीरातील महत्वाच्या अवयवांत पसरणार नाही.

जेव्हा ममता यांची कन्या श्रम्या हिला आईला झालेल्या सर्पदंशाविषयी समजलं, तेव्हा ती सावध झाली. विष अंगात पसरू नये म्हणून कोरड्या गवताची गाठ पुरेशी नाही, असं तिच्या लक्षात आलं. आईचा जीव वाचवण्यासाठी श्रम्याने तिला रुग्णालयात नेण्यापूर्वी तिच्या तोंडावाटे विष शोषून घेतले.

ज्या मित्राच्या घरी जेवला, त्याचाच जीव घेतला, मजामस्तीत एक गोष्ट ठरली दोस्तीत कुस्तीचं कारण
श्रम्याने वेळीच केलेल्या कृत्यामुळे ममता यांचा जीव वाचल्याचे रुग्णालयातील डॉक्टरांनीही सांगितले. ममता यांना एक दिवस रुग्णालयात ठेवण्यात आले आणि त्यानंतर त्यांची तब्येत चांगली असल्याने त्यांना डिस्चार्ज देण्यात आला. ममता राय यांना चावणारा साप मलबार पिट व्हायपर प्रजातीचा होता.

आपल्या कॉलेजमध्ये स्काउट आणि गाईड रेंजर असलेल्या श्रम्याने तिच्या आईला सर्पदंशाच्या गंभीर परिणामांपासून वाचवल्याबद्दल तिचे कौतुक केले आहे. विष शोषण्याचे हे तंत्र कसे काम करते हे तिने ऐकले होते, आणि चित्रपटातही पाहिले होते, असे श्रम्याने सांगितले.


भारतात सर्पदंशाचे प्रमाण मोठे असल्याची माहिती आहे. नेचर कम्युनिकेशन्समध्ये प्रकाशित केलेल्या अहवालानुसार, जगभरातील सर्पदंशाच्या ७८ हजार ६०० घटनांपैकी ६४,१०० मृत्यू भारतात झालेत.