पद्मावत: लष्करातील जवानांनी अन्नत्याग करावा

जयपूर :

सिनेदिग्दर्शक संजय लीला भन्साळी यांच्या 'पद्मावत' सिनेमाला विरोध म्हणून लष्करातील क्षत्रिय समाजातील जवानांनी अन्नत्याग करावा, असं आवाहन करणी सेनेनं केलं आहे.

करणी सेनेचे प्रमुख महिपाल सिंह मकराना यांनी हे आवाहन केलं आहे. 'सीमेवर देशाचं संरक्षण करणाऱ्या जवानांनीही राणी पद्मावतीच्या प्रतिष्ठेचं रक्षण करण्यासाठी पुढे यावं. तुमच्या बहिणींचा सन्मान आणि इभ्रतीचा हा प्रश्न आहे. त्यामुळे तुम्हीही एका दिवसासाठी लष्करातील मेसच्या जेवणावर बहिष्कार टाकावा,' असं आवाहन महिपाल सिंह मकराना यांनी केलं आहे.

'सरकार जर ऐकतच नसेल तर क्षत्रिय जवानांनी एका दिवसासाठी शस्त्र खाली ठेवावेत,' असं आवाहनही त्यांनी केलं. तसेच सेन्सॉर बोर्डाचे अध्यक्ष प्रसून्न जोशी यांनी हरयाणात पायही ठेवू नये, असा इशाराही त्यांनी दिला. राजपूत करणी सेनेचे अध्यक्ष सुखदेव सिंह कालवी यांनीही मकराना यांच्या निर्णयाचं समर्थन केलं. सिनेमागृहात हा चित्रपट दाखवला तर जनताच संचारबंदी लागू करेल, असं कालवी म्हणाले. 'पद्मावत' प्रदर्शित करण्याची परवानगी देणाऱ्या, तसेच त्याचं समर्थन करणाऱ्यांना जयपूरमध्ये प्रवेश देणार नाही, असेही सिंह यांनी म्हटलं आहे.