करुणानिधींना श्रद्धांजली; उद्या राष्ट्रीय दुखवटा

नवी दिल्ली

तामिळनाडूचे माजी मुख्यमंत्री एम. करुणानिधी यांच्या निधनानंतर केंद्र सरकारने उदया (बुधवार) देशात राष्ट्रीय दुखवटा पाळण्याची घोषणा केली आहे. पंतप्रधान नरेंद्र मोदी यांच्यासह देशातील अनेक मोठे नेते करुणानिधी यांच्या अंत्यसंस्काराला उपस्थित राहणार आहेत.

केद्र सरकारने प्रसिद्ध केलेल्या निवेदनानुसार, दिल्ली आणि देशातील सर्व राज्यांच्या राजधान्यांमध्ये उद्या राष्ट्रध्वज अर्ध्यावर उतरवण्यात येईल. चेन्नईत सरकारी इतमामात करुणानिधी यांच्या पार्थिवावर अंत्यसंस्कार होतील.

दरम्यान, करुणानिधी यांच्या अंत्यस्कारासाठी चेन्नईतील मरीना बीचवर जागा देण्यास एआयएडीएमके सरकारने विरोध केल्यानंतर चैन्नईत तणाव निर्माण झाला. तत्पूर्वी करुणानिधी यांच्यावर अंत्यसंस्कार करण्यासाठी मरीना बीचवर जागा द्यावी अशी मागणी डीएमके पक्षाने केली होती.

सरकारने नकार दिल्यानंतर चैन्नईत कावेरी हॉस्पिटलच्या बाहेर डीएमके समर्थक हिंसक झाले. परिस्थितीचे गांभीर्य लक्षात घेत मद्रास हायकोर्ट या प्रकरणाची आजच रात्री सुनावणी घेणार आहे.