चंदननं मुस्लीम तरुणाला दिलं होतं रक्त!

लखनऊ:

उत्तर प्रदेशातील कासगंज हिंसाचारात मारल्या गेलेल्या चंदन गुप्ता याने काही दिवसांपूर्वी एका मुस्लिम तरुणाला रक्तदान केले होते, अशी माहिती त्याच्या कुटुंबीयांनी दिली आहे. चंदनला शहिदाचा दर्जा देण्यात यावा, अशी मागणी त्याच्या कुटुंबीयांनी मुख्यमंत्री योगी आदित्यनाथ यांच्याकडे केली आहे.

चंदनच्या कुटुंबीयांनी मंगळवारी मुख्यमंत्री योगी आदित्यनाथ यांची भेट घेतली. त्यांनी विविध मागण्यांचे निवेदन योगींना दिले. भारत मातेच्या सन्मानासाठी चंदनने गोळ्या झेलल्या. त्यामुळे त्याला शहीद दर्जा देण्यात यावा, अशी मागणी त्यांनी केली. त्यावर योगी यांनी कोणतेही आश्वासन दिले नाही. दोषींविरोधात कठोर कारवाई करण्यात यावी, अशी मागणी चंदनची बहीण कीर्तीने केल्यानंतर दोषींवर कारवाई करण्याचे आश्वासन योगींनी दिले. चंदनला शहिदाचा दर्जा न दिल्यास कोणतीच आई आपल्या मुलांना तिरंगा फडकावण्यासाठी पाठवणार नाही, असे चंदनच्या कुटुंबीयांनी सांगितले. दरम्यान, चंदनच्या हत्येप्रकरणी पोलिसांनी सलमान नावाच्या आरोपीला अटक केली आहे. त्यापूर्वी या प्रकरणात पोलिसांनी राहत कुरेशी यालाही अटक केली होती.