शब्बीर शाहला ‘ईडी’ची कोठडी

नवी दिल्ली : जम्मू-काश्मीरमधील फुटीरतावादी नेता शब्बीर शाह यास बुधवारी सक्तवसुली संचलनालयाची (ईडी) सात दिवसांची कोठडी सुनावण्यात आली. दहशतवादी कारवायांसाठी आर्थिक रसद पुरविण्याच्या दशकभराच्या खटल्यासंदर्भात दिल्ली कोर्टाने हे निर्देश दिले आहेत.

शाह यास बुधवारी अटक करण्यात आली. मात्र, तो सहकार्य करीत नसल्याची तक्रार ‘ईडी’च्या अधिकाऱ्यांनी केली होती. त्यामुळेच अतिरिक्त सत्र न्यायाधीश सिद्धार्थ शर्मा यांनी शाह याची कोठडीत चौकशी करण्यास परवानगी दिली. कोर्टाने याच महिन्यात शाह याच्याविरोधात अजामीनपात्र वॉरंट बजावले होते. दिल्ली पोलिसांच्या विशेष पथकाने २६ ऑगस्ट २००५मध्ये हवाला व्यापारी महंमद अस्लम वाणी यास अटक केली होती. शाहला सव्वादोन कोटी रुपये दिल्याचा दावा तेव्हा वाणी याने केला होता. पोलिसांनी शाह आणि वाणींवर निधी अफरातफरीप्रकरणी फौजदारी खटला भरला आहे. मुख्य म्हणजे ६३ लाख रुपये आणि स्फोटकाच्या मोठ्या साठ्यासह वाणी पोलिसांना सापडला होता. मध्य-पूर्व आशियातून त्यास मदत मिळत असल्याचा तेव्हा पोलिसांना संशय होता.