अतिरेक्याच्या अंत्ययात्रेत बंदुकीच्या फैरी

मटा ऑनलाइन वृत्त । श्रीनगर

लष्कराच्या मोस्ट वाँटेड यादीत असणारा लष्कर-ए-तोयबाचा कमांडर जुनैद मट्टू याच्या अंत्ययात्रेत सशस्त्र अतिरेक्यांनी बंदुकीच्या फैरी झाडल्या. मट्टू आपल्या दोन साथीदारांसोबत जिल्ह्याच्या अरवनी गावात शुक्रवारी सैन्याकडून मारला गेला. त्याला खुदवानी गावात दफन केले. या अंत्ययात्रेत शेकडो लोक सामील झाले होते.

अतिरेक्याच्या अंत्ययात्रेत त्याच्या साथीदारांनी हवेत बंदुका नाचवणे आणि बंदुकीच्या फैरी झाडण्याचा हा प्रघात हिजबुल कमांडर बुरहान वाणीच्या अंत्ययात्रेपासून पडला. बुरहान वाणीलादेखील लष्कराने एका चकमकीत कंठस्नान घातले होते. मिळालेल्या वृत्तानुसार, जुनैद मट्टूला दफन करण्याआधी लोकांनी अंत्यसंस्कार विधी म्हणून ४ वेळा नमाज अदा केले. केवळ आसपासच्या भागातूनच नव्हे तर दक्षिण काश्मीरमधून सुद्धा लोक जुनैदच्या अंत्ययात्रेला आले होते.

मट्टू लष्कराच्या १२ मोस्ट वाँटेड दहशतवाद्यांच्या यादीत होता. त्याच्यावर १० लाख रुपयांचे इनामही होते. गुरुवारी कुलगाममधील बोगंद क्षेत्रात एका पोलीस कॉन्स्टेबलच्या हत्येत मट्टू सहभागी होता. मट्टूसोबत नासिर आणि आदिल या दोन अतिरेक्यांनाही लष्कराने ठार केले.