आप मंत्र्याची हकालपट्टी

नवी दिल्ली : दिल्लीचे मुख्यमंत्री अरविंद केजरीवाल यांनी मंत्रिमंडळातील सदस्य संदीप कुमार यांची बुधवारी तातडीने हकालपट्टी केली. संदीप कुमार यांच्यासंबंधातील आक्षेपार्ह सीडी मिळाल्यामुळे त्यांची हकालपट्टी केल्याचे ट्वीट केजरीवाल यांनी केले आहे. या सीडीमध्ये ‘सेक्स टेप’ आणि त्यासारखीच काही छायाचित्रे आढळली आहेत.

‘भ्रष्टाचाराचा अथवा अयोग्य वर्तनाचा कोणताही आरोप आप सहन करणार नाही. आमच्याकडे केवळ मंत्रीच नव्हेत, तर ६७ आमदार आहेत. पक्षात कोणत्याही पदावर असलेल्या व्यक्तीचे अशा पद्धतीचे वर्तन खपवून घेणार नाही,’ असे केजरीवाल यांनी म्हटले आहे. आप सरकार सत्तेवर आल्यावर म्हणजे २०१५पासून सरकारमधून हकालपट्टी करण्यात आलेले संदीप कुमार हे तिसरे मंत्री आहेत.

सीडी १५ दिवसांपूर्वीच केजरीवालांकडे?

एबीपी न्यूज वृत्तवाहिनीच्या म्हणण्यानुसार संदीप कुमार यांच्याशी संबंधित ही आक्षेपार्ह सीडी बुधवारी सायंकाळी ५ वाजता त्यांच्यापर्यंत पोहोचली. त्यानंतर वाहिनीने रात्री ८ वाजताच्या सुमारास केजरीवाल यांच्याशी संपर्क साधला. त्यानंतर रात्री ८.३० वाजता केजरीवाल यांनी संदीप कुमार यांची मंत्रिपदावरून हकालपट्टी केली. 'एबीपी'ला ओमप्रकाश नावाच्या व्यक्तीने ही सीडी दिली. त्याच्या म्हणण्यानुसार, त्याने १५ दिवसांपूर्वीच ही सीडी केजरीवाल यांच्याकडे दिली होती पण काहीच कारवाई करण्यात आली नाही. दरम्यान, दिल्लीचे नायब राज्यपाल नजीब जंग यांच्यापर्यंतही मंगळवारी ही सीडी पोहोचवण्यात आली होती आणि त्यानंतर वृत्तवाहिनीकडे गेल्यानेच वेगाने सूत्रे हलल्याचे त्याचे म्हणणे आहे.