‘केजरीवाल मला मारतील: 'आप' आमदार

नवी दिल्ली : ‘दिल्लीचे मुख्यमंत्री अरविंद केजरीवाल आणि काही ‘आप’ कार्यकर्त्यांनी मला आणि माझ्या कुटुंबीयांना जीवे मारण्याची धमकी दिली आहे,’ असा आरोप ‘आप’चे आमदार असिम अहमद खान यांनी गुरुवारी केला.

‘पंतप्रधान नरेंद्र मोदी माझी हत्याही घडवून आणतील,’ असा आरोप दिल्लीचे मुख्यमंत्री अरविंद केजरीवाल यांनी बुधवारी केला होता. त्यानंतर गुरुवारी दिल्लीतील मतिया महल मतदारसंघाचे आमदार असलेल्या खान यांनी केजरीवालांवर आरोप केला. ‘नऊ-दहा महिन्यांपासून मला जीवे मारण्याच्या धमक्या येत आहेत. माझ्या कुटुंबालाही धोका आहे. केजरीवाल आणि काही पक्ष कार्यकर्ते मला ठार मारण्याचा कट रचत आहे,’ असा आरोप खान यांनी पत्रकार परिषदेत केला. फोन आणि प्रत्यक्ष लोकांकडून धमक्या आल्या असून त्याबद्दल २ मे रोजी केंद्रीय गृहमंत्री राजनाथसिंह, तसे नायब राज्यपालांना पत्र पाठवल्याचेही खान म्हणाले.

केजरीवाल यांच्या मंत्रिमंडळात खान यांच्याकडे अन्न आणि नागरी पुरवठा खाते होते. मतदारसंघातील इमारतीच्या बांधकामाला परवानगी देण्यासाठी खान यांनी सहा लाख रुपये घेतल्याचा आरोप झाला होता. त्यानंतर गेल्या वर्षी ऑक्टोबरमध्ये केजरीवाल यांनी त्यांना मंत्रिमंडळातून काढून टाकले होते.