भावासाठी ४६ कोटी उभारले, पण स्वत: मृत्यूसोबतची झुंज हरली; १६ वर्षीय मुलीची हृदयद्रावक कहाणी

कोझिकोड: केरळच्या कन्नूर जिल्ह्यात राहणारी १६ वर्षांची आफरा आयुष्यासोबतच्या संघर्षात पराभूत झाली. कन्नूरच्या मट्टूलमध्ये वास्तव्यास असलेल्या आफरानं कोझीकोड येथील एका खासगी रुग्णालयात अखेरचा श्वास घेतला. स्पायनल मस्क्युलर एट्रोफी आजारानं ग्रस्त असलेल्या आफरानं तिचा भाऊ मोहम्मदच्या उपचारांसाठी मोहीम हाती घेतली आणि जवळपास ४६ कोटी रुपये उभारले.

भावाचा जीव वाचवण्यासाठी आफरा लढत होती. मात्र त्याच आजरानं आफराचा जीव घेतला. भावाचा जीव वाचवण्यासाठी आफरानं हाती घेतलेल्या मोहिमेचं जगभरातून कौतुक झालं. अनेकांनी सढळ हस्ते मदत केली. जगभरातले लोक आफराच्या भावाची मदत करण्यासाठी पुढे आले. भावावर उपचार करण्यासाठी पैशांची आवश्यकता होती. आफरानं लोकांना भावुक आवाहन केलं. लोकांनी भरभरून मदत केली आणि ४६ कोटी रुपये जमले. स्पायनल मस्क्युलर एट्रोफीशी संबंधित गुंतागुंत वाढल्यानं गेल्या काही दिवसांपासून आफरावरही उपचार सुरू झाले.
दोन हजारांच्या नोटेबद्दल मोदी सरकारकडून धोक्याचा इशारा; जाणून घ्या कारण
आफराचा भाऊ मोहम्मदला स्पायनल मस्क्युलर एट्रोफी नावाचा दुर्मीळ आजार झाला. तो २ वर्षांच्या वयाचा होण्यापूर्वी त्याला १८ कोटी रुपयांचं इंजेक्शन देण्याची गरज होती. भावाचा जीव वाचवण्यासाठी आफरानं लोकांना आवाहन केलं. स्वत: व्हिलचेअरवर असलेली आफरा मोहम्मदसाठी परिस्थितीशी मोठ्या निर्धारानं दोन हात करत होती. भावासाठी लढणाऱ्या आफराचा व्हिडीओ जगभरात व्हायरल झाला. त्यानंतर लोकांनी सढळ हातांनी मदत केली.

आजारामुळे माझे पाय आणि पाठीचं हाड वळलं आहे. मला झोपणंही कठीण जात आहे. मात्र माझ्या लहान भावाची स्थिती अशी नाही. तो जमिनीवर रांगत आहे आणि सक्रिय आहे. त्याला आताच औषध मिळाल्यास तो वाचू शकेल. तुम्ही सगळ्यांना मदत केल्यास त्याला वाचवता येईल. त्याची अवस्था माझीसारखी होऊ नये, असं आवाहन आफरानं काल केलं.
लग्नानंतर ७ वर्षांनी महिला गर्भवती, एकाचवेळी ५ बाळांना जन्म दिला; पण आनंद फक्त ४ दिवस टिकला
आफराच्या आवाहनाला लोकांनी उत्तम प्रतिसाद दिला. लोकांनी १८ कोटींच्या जागी ४६ कोटी रुपये गोळा केले. स्पायनल मस्क्युलर एट्रोफी आजारानं ग्रस्त असलेल्या आफराला गायन आणि चित्रकलेची आवड होती. अतिशय हुशार असलेल्या आफराला डॉक्टर व्हायचं होतं. सफा इंग्लिश माध्यमाच्या शाळेत ती दहावीत शिकत होती. मट्टूल सेंट्रल जुमा मशीद कब्रस्तानात आफरावर अंत्यसंस्कार करण्यात आले.