केरळच्या पद्मनाभस्वामी मंदिरात चुडीदारवर बंदी

मटा ऑनलाइन वृत्त । कोच्ची

महिलांना चुडीदार आणि पायजमा परिधान करुन केरळच्या पद्मनाभस्वामी मंदिरात प्रवेश करण्यास घालण्यात आलेली बंदी केरळ उच्च न्यायलयाने कायम ठेवली आहे. मंदिराचे रीतीरिवाज पाहता मंदिर समितीने घेतलेला हा निर्णय योग्यच असल्याचे उच्च न्यायालयाने स्पष्ट केले आहे.

काही दिवसापुर्वी जुनी परंपरा मोडीत काढत महिला भाविकांना मंदिर प्रवेशासाठी ड्रेस कोडमध्ये सुट देण्यात आली होती. त्यामुळे महिला सलवार कमीज आणि चुडीदार परिधान करुन पुजापाठ करु शकत होत्या. मंदिराचे कार्यकारी अधिकारी के.एन.सतीश यांनी हा निर्णय घेतला होता. या निर्णयावर मंदिर प्रमुखांनी तिव्र आक्षेप नोंदविला होता.


त्यानंतर केरळ उच्च न्यायालयात एक जनहित याचिका दाखल करण्यात आली होती.त्यावर निर्णय देताना ३० दिवसात ड्रेस कोडचा प्रश्नमार्गी लावण्याचे आदेश न्यायालयाकडून मंदिराच्या मुख्य कार्यकारी अधिकाऱ्याला देण्यात आले होते. महिलांना सलवार आणि चुडीदार परिधान करुन मंदिरात येण्याची परवानगी देण्याची मागणी या याचिकेत करण्यात आली होती. न्यायालयाने ही मागणी अमान्य करत याचिका फेटाळून लावली.