केरळमधील बलात्कार; संसदेत पडसाद

नवी दिल्ली : कायद्याची विद्यार्थिनी असलेल्या ३० वर्षीय तरुणीवर केरळमध्ये झालेल्या बलात्कार प्रकरणाचे बुधवारी संसदेत जोरदार पडसाद उमटले. राज्यसभेचे उपसभापती पी. जे. कुरियन यांनी ही अत्यंत लज्जास्पद घटना असल्याचे म्हटले, तर संसदीय कामकाजमंत्री मुख्तार अब्बास नक्वी यांनी ही घटना म्हणजे अमानुषतेच्या सर्व मर्यादांचे उल्लंघन असल्याचे नमूद केले.

राज्यात १६ मे रोजी होणाऱ्या विधानसभा निवडणुकीच्या पार्श्वभूमीवर या प्रकरणाला राजकीय वळण लागले आहे. प्रामुख्याने आरोपींना पकडण्यात पोलिस दिरंगाई करत असल्याची टीका विरोधी पक्षाकडून होत आहे. मात्र मुख्यमंत्री ओमन चंडी यांनी पीडित तरुणीच्या कुटुंबीयांची भेट घेऊन १० लाखांची मदत व बहिणीला सरकारी नोकरी देण्याची घोषणा केली. दरम्यान, केरळ पोलिसांनी संशयित बलात्काऱ्याचे स्केच जारी केले असून, तिघांना चौकशीसाठी ताब्यात घेतले आहे.