मुगाच्या खिचडीचं ब्रँडिंग होणार

मटा ऑनलाइन वृत्त । नवी दिल्ली

अस्सल भारतीय खाद्यपदार्थ असेल्या मुगाच्या खिचडीला आता नवीन ओळख मिळणार आहे. केंद्र सरकार खिचडीचं आंतरराष्ट्रीय स्तरावर 'ब्रँडिंग' करणार आहे. येत्या शनिवारी ४ नोव्हेंबर रोजी साजऱ्या होणाऱ्या खाद्य दिनी दिल्लीत मुगाच्या खिचडीचं खास ब्रँडिंग करण्यात येणार आहे.

दिल्लीत उद्या ३ नोव्हेंबर रोजी 'विश्व खाद्य भारत' महोत्सवाचं आयोजन करण्यात आलं आहे. या महोत्सवात ४ नोव्हेंबर रोजी केंद्रीय अन्न व नागरी पुरवठा मंत्रालयाच्या पुढाकाराने इंडिया गेटच्या लॉनवर शेफ संजीव कपूर यांच्या नेतृत्वाखाली १ हजार किलो खिचडी बनविण्यात येणार आहे. त्यासाठी ५० लोक कामाला लागणार आहेत. या खिचडीचं विदेशी पाहुणे आणि गरिबांमध्ये वाटप करण्यात येणार आहे. शनिवारी होणाऱ्या या अनोख्या विक्रमाची नोंद गिनिज बुकमध्ये होऊ शकते, असं सुत्रांनी सांगितलं. खिचडीचं आतंरराष्ट्रीय स्तरावर ब्रँडिंग करण्यासाठी हे आयोजन करण्यात आल्याचंही सुत्रांनी सांगितलं. मुगाची खिचडी ही चविष्ट, कमी वेळात आणि खर्चात तयार होते. खिचडी सर्वांना आवडते, तसेच ती आरोग्यासाठीही गुणकारी असल्याने हा निर्णय घेण्यात आला आहे.