मोदी-शरीफ भेटणार?

मटा ऑनलाइन वृत्त । इस्लामाबाद

भारतीय नौदलाचे माजी अधिकारी कुलभूषण जाधव यांना हेर ठरवून पाकिस्ताननं फाशीची शिक्षा सुनावल्यामुळं दोन देशांमध्ये तणाव निर्माण झाला असतानाच पंतप्रधान नरेंद्र मोदी व पाकचे पंतप्रधान नवाझ शरीफ यांची भेट होण्याची शक्यता आहे. या भेटीत कुलभूषण जाधव यांच्याबाबत चर्चा होण्याची शक्यता आहे.

'शांघाय कॉर्पोरेशन ऑर्गनायझेशन' या संघटनेची बैठक लवकरच कझाकिस्तानमध्ये होणार आहे. रशिया, चीन व भारतासह पाकिस्तानही संघटनेचा सभासद आहे. या बैठकीच्या वेळी भारत व पाकिस्तानमध्ये द्विपक्षीय चर्चा होण्याची शक्यता आहे. भारतीय नागरिक कुलभूषण जाधव यांना हेर ठरवून पाकनं त्यांना फाशीची शिक्षा सुनावली आहे. त्यावरून दोन्ही देशांमध्ये शाब्दिक युद्ध भडकलं आहे. त्याच पार्श्वभूमीवर मोदी व शरीफ यांची भेट होणार असल्यानं त्याकडं सर्वांचंच लक्ष लागलं आहे.

याआधीही भारत-पाकमध्ये तणाव असताना दोन्ही देशांच्या सर्वोच्च नेत्यांच्या अचानक भेटी झाल्या होत्या. या भेटीनंतर दोन्ही देशांच्या संबंधातील तणाव बराचसा निवळलाही होता. यावेळीही त्याचीच पुनरावृत्ती होण्याची शक्यता वतर्वण्यात येत आहे.