लालू-राबडी यांना मिळणारी VVIP सुविधा बंद

मटा ऑनलाइन वृत्त । पाटणा

राष्ट्रीय जनता दलाचे नेते लालू प्रसाद यादव आणि त्यांच्या पत्नी राबडी देवी यांना विमानतळावर देण्यात येणारी व्हीव्हीआयपी सुविधा केंद्र सरकारने बंद केली आहे.

लालू प्रसाद यादव यांना २००९ पासून ही व्हीव्हीआयपी सुविधा देण्यात येत होती. परंतु ती आता बंद करण्यात आली आहे. हवाई नागरी वाहतूक मंत्रालयाने यासंदर्भात पाटणामधील आंतरराष्ट्रीय एअरपोर्टचे संचालक जयप्रकाश नारायण यांना पत्र पाठवले असून लालू-राबडी देवी यांना व्हीव्हीआयपी सुरक्षा देऊ नये, असे त्या पत्रात म्हटले आहे. पाटणा एअरपोर्टचे संचालक राजेंद्र सिंह लाहौरिया यांनी सर्व विमान कंपन्या आणि सुरक्षा एजंसीच्या सीआयएसएफ यांना यासंदर्भात सूचना दिली आहे.

हवाई वाहतूक मंत्रालयाच्या निर्देशानुसार, आता यापुढं लालू प्रसाद यादव आणि राबडी देवी यांना व्हीव्हीआयपी सुविधा मिळणार नाही. ही सुविधा बंद करण्यात आल्याने हे दोघेही त्यांच्या वाहनाने एअरक्राफ्टपर्यंत जाऊ शकणार नाहीत. त्यांना विमानतळावर आल्यानंतर अन्य विमान प्रवाशांसारखी सुरक्षा तपासणी केल्यानंतरच सोडण्यात येईल, असे राजेंद्र सिंह लाहौरिया यांनी सांगितले. दरम्यान, सध्या ही सुविधा बिहारमधील राज्यपाल, मुख्यमंत्री नितीश कुमार, केंद्रीय मंत्री रामविलास पासवान आणि खासदार शत्रुघ्न सिन्हा यांना मिळणार आहे.

राजदची केंद्र सरकारवर टीका

लालू प्रसाद यादव हे बिहारचे माजी मुख्यमंत्री व माजी केंद्रीय रेल्वेमंत्री आहेत. देशातील बड्या नेत्यांपैकी ते एक आहेत. केंद्र सरकार जाणिवपूर्वक त्यांना लक्ष्य करीत आहे, असा आरोप राजदचे प्रवक्ते मनोज झा यांनी केला.