प्रीतम मुंडेच्या नावाचा वापर करून जमीन लाटली

म. टा. प्रतिनिधी, बीड

बीडच्या खासदार डॉ. प्रीतम मुंडे यांच्या बनावट लेटरपॅडचा वापर करून गायरान जमीन लाटण्याचा प्रकार बीडमध्ये उघड झाला आहे. संबंधित संस्थेला जमीन देण्याबाबतचे पत्र खासदारांच्या बनावट पत्राद्वारे जिल्हाधिकारी यांना देण्यात आले होते. गायरान जमीन लाटण्यासाठी गेवराई तालुक्यातील आम्ला वाहेगाव येथील पंडित दिनदयाळ संस्थेने हा प्रकार केल्याचे समोर आले असून या प्रकरणी बीड पोलिस ठाण्यात फसवणुकीचा गुन्हा नोंद झाला आहे.

गेवराई तालुक्यात आम्ला वाहेगाव येथे पंडित दिनदयाल रुग्णालय व गोपीनाथ मुंडे निर्सगोपचार केंद्राचे पदाधिकारी यांनी बीडच्या खासदार डॉ. प्रीतम मुंडे यांचे बनावट लेटरपॅड तयार केले. त्यावर गेवराई तालुक्यात वाहेगाव प‌रिसरातील गायरान जमीन संस्थेला देण्यात यावी, असे पत्र जिल्हाधिकारी यांना देण्यात आले होते. हा प्रकार फसवणुकीचा असल्याचे लक्षात आले. त्यानंतर डॉ. मुंडे यांचे स्वीय सहायक नवनाथ सानप यांनी बीड ग्रामीण पोलिस ठाण्यात या तक्रार दिली. संस्थेच्या पदाधिकारी यांच्या विरोधात गुन्हा दाखल करण्यात आला आहे.