जोशीमठमधील भूस्खलन धोक्याच्या पातळीवर; आणखी शेकडो घरे धोकादायक

देहराडून : उत्तराखंडच्या जोशीमठमधील भूस्खलन अधिक धोकादायक पातळीवर पोहोचले असून, रविवारी काही भागांत जमीन खचण्याचे प्रकार घडले. शहरातील आणखी दोन हॉटेले एकमेकांवर कलल्याचे समोर आले असून, ओली रोपवेजवळील जमिनीच्या भेगाही अधिकच विस्तारल्या आहेत.

जोशीमठमध्ये स्थलांतराची मोहीम सुरू असतानाच रविवारी हा भाग अधिक खचू लागल्याचे स्पष्ट झाले. पाडकामाची मोहीम सुरू असलेल्या दोन धोकादायक हॉटेलांपासून अवघ्या १०० मीटर अंतरावरच आणखी दोन हॉटेले एकमेकांवर झुकल्याचे समोर आले. या दोन हॉटेलांच्या भिंतींमधील अंतर चार फुटांवरून अवघ्या काही इंचांवर आले आहे. जोशीमठ-ओली रोपवेजवळील रस्त्यावरील भेगाही विस्तारल्याचे रविवारी दिसले. रोपवेच्या संरक्षक भिंतीजवळच या भेगा चार इंच रुंद व २० फूट लांब झाल्या आहेत.

२३३ कुटुंबांना सुरक्षित स्थळी हलवले

शहरातील मारवारी भागात २ जानेवारीपासून भूगर्भातून पाणी झिरपत आहे. शनिवारी रात्रीपासून पाण्याच्या या प्रवाहात वाढ झाली. पूर्वीच्या १९० लिटर प्रतिलिटरवरून रविवारी या पाण्याचा प्रवाह २४० लिटर प्रतिमिनिट इतका वाढला आहे. शहरातील जे. पी. कॉलनी या भागात गेल्या काही दिवसांपासून भूगर्भातून चिखलयुक्त पाणी वाहत आहे. याच्या प्रवाहातही वाढ झाल्याचे रविवारी दिसून आले. रविवारी सर्वांत धोकादायक स्थिती घरांची दिसून आली. भेगा पडलेल्या घरांची संख्याही वाढून रविवारी ८२६पर्यंत पोहोचली. यापैकी २३३ कुटुंबांना रविवारपर्यंत सुरक्षित स्थळी हलवण्यात आले आहे. या कुटुंबांना रेशन, ब्लँकेट, जेवण, हीटर पुरवण्यात आले आहे.